Վրաստանի հավաքականը Ազգերի լիգայի 2-րդ տուրի խաղում հյուրընկալվելիս հաղթեց Ալբանիայի ընտրանուն՝ 1-0: Այս հանդիպման միակ գոլը խփեց Գիորգի Կոչորաշվիլին։
Վրացիները 6 միավորով գլխավորում են B լիգայի մրցաշարային աղյուսակի 1-ին խումբը:
Պավել Շուլցի դուբլը և Տոմաս Սոուչեկի 11 մետրանոցից գոլը Չեխիային հաղթանակ բերեց Ուկրաինայի հետ խաղում (3-2):
Չեխերը վաստակել են 3 միավոր և քառյակում զբաղեցնում են երրորդ հորիզոնականը․ Ալբանիան նույնքան միավորով երկրորդն է։ Վերջին տեղում ուկրաինացիներն են (0 միավոր):
Գերմանիայի հավաքականը ոչ-ոքի խաղաց Նիդեռլանդների ընտրանու հետ՝ 2-2։
Հանդիպման հաշիվը 2-րդ րոպեին բացել է հոլանդացի կիսապաշտպան Տիջանի Ռեյնդերսը։ Առաջին խաղակեսի վերջնամասում Դենիս Ունդավի ու Յոսուա Կիմիխի գոլերի շնորհիվ գերմանացիները առաջ անցան հաշվի մեջ։ 51-րդ րոպեին Դենզել Դումֆրիսը կրկին հավասարեցրեց հաշիվը։
Թիմերը վաստակել են 4-ական միավոր, սակայն Գերմանիան A լիգայի 3-րդ խմբում առաջին տեղում է՝ լրացուցիչ ցուցանիշներով առաջ անցնելով Նիդեռլանդներից։
Հունգարիայի ու Բոսնիա և Հերցեգովինայի հանդիպումն ավարտվեց գոլազուրկ ոչ-ոքիով: Բոսնիան 1 միավորով երրորդն է մրցաշարային աղյուսակում, իսկ հունգարացիները (1) վերջին տեղում են։
