Եթե դուք ասում եք, որ Արցախի լուծարման թուղթը վավեր չէ, ինչո՞ւ էիք ամեն ինչ անում, որ Արցախի ժողովուրդը դուրս գա Արցախից, ասեիք՝ վավեր չէ: Այս մասին ԱԺ նիստում ընդդիմադիր պատգամավորներին հարցրեց «Քաղաքացիական պայմանագիր» խմբակցության քարտուղար Արթուր Հովհաննիսյանը:
«Ինչո՞ւ էիք համոզում, որ հանձնեն Արցախը, ինչո՞ւ գնացիք դաշնակներով նախագահ ընտրեցիք, որը լուծարեց, ես ձեր տրամաբանությունը չեմ հասկանում, դուք ձեր տրամաբանությունը հասկանո՞ւմ եք»,- հայտարարեց նա:
Հովհաննիսյանը շեշտեց՝ ընդդիմությունն ասում է, թե այդ թուղթը վավեր չէ, բայց այդ թղթի հիմքով Արցախի ժողովուրդը բռնի տեղահանվել է նրանց գործողությունների արդյունքում:
«Մեզ ընդդիմությունն առաջարկում է հանդիպել Լեռնային Ղարաբաղի պատգամավորների հետ: Ես, օրինակ, անձնապես ցանկություն չունեմ հանդիպելու Լեռնային Ղարաբաղի պատգամավորների հետ: Դուք լսե՞լ եք՝ Լեռնային Ղարաբաղի պատգամավորներն ինչ լեքսիկոնով ու ինչ բառամթերքով են խոսում ՀՀ ժողովրդի կողմից ընտրված ԱԺ-ի մեծամասնության մասին, խայտառակություն է ուղղակի:
Դուք մտածում եք, որ մենք իրենց հետ պետք է հանդիպե՞նք: Իրենց հետ նախ պետք է իրավապահները հանդիպեն՝ հասկանան՝ այդ ի՞նչ պայմանավորվածությունների արդյունքում լուծարեցին Լեռնային Ղարաբաղը և «յուղը վրան» զենքերն էլ նվիրեցին ադրբեջանիցներին»,- ասաց նա:
Պատգամավորը ևս մեկ անգամ ընդգծեց՝ ընդդիմությունն է հրաժարվել Արցախից:
«Դուք եք հրաժարվել Լեռնային Ղարաբաղից, դուք եք պալատական հեղաշրջում արել և վաճառել Լեռնային Ղարաբաղը և ամեն ինչ արել եք, որ ԼՂ ժողովուրդը բռնի տեղահանվի, զրկանքների միջով անցնի ու գա այստեղ»,- շեշտեց նա:
