«Հեզբոլլահ»-ը Լիբանանից շուրջ 50 արկ է արձակել Իսրայելի ուղղությամբ, Իսրայելը ևս հարվածներ է հասցրել
Իսրայելական բանակը սեպտեմբերի 8-ի գիշերն արձանագրել է Լիբանանից շուրջ 50 արկի արձակումը։ Նույն գիշեր Իսրայելի պաշտպանության բանակը հարվածներ է հասցրել «Հեզբոլլահ» շարժման՝ Լիբանանի հարավում գտնվող թիրախներին:
Մոտ 20 հրթիռ է արձակվել Իսրայելի Կիրյաթ Շմոնա քաղաքի մոտակայքում, Իսրայելի հակաօդային պաշտպանությունը որսացել է դրանց մեծ մասը: Եվս մոտ 30 հրթիռ հատել է սահմանը Վերին Գալիլեայում։ ՀՕՊ համակարգերը որսացել են դրանցից մի քանիսը, իսկ մնացածներն ընկել են բաց տարածքներում, ասվում է Իսրայելի պաշտպանության բանակի թելեգրամյան հաղորդագրության մեջ:
Իսրայելի ռազմաօդային ուժերը հարվածներ են հասցրել «Հեզբոլլահ»-ի թիրախներին Այտարուն, Մարուն ալ Ռաս եւ Յարուն շրջաններում։