Փաշինյանը Ալիևին երկկողմ ձևաչափով հանդիպում է առաջարկել
Հայաստանի վարչապետ Նիկոլ Փաշինյանը դիվանագիտական խողովակներով Ադրբեջանի նախագահ Իլհամ Ալիևին առաջարկել է երկկողմ հանդիպում՝ դիտարկելով նաև Հայաստան–Ադրբեջան սահմանին հանդիպման տարբերակը:
«Արմենպրես»-ի հաղորդմամբ՝ Փաշինյանն այս մասին ասաց ասուլիսում՝ անդրադառնալով բանակցություններում միջնորդների վերաբերյալ հարցին, ՌԴ նախագահ Վլադիմիր Պուտինի հայտարարությանը, որ ՌԴ–ն ուրախ կլինի, եթե ինչ–որ բան կարողանա անել Հայաստանի և Ադրբեջանի միջև սահմանազատման և խաղաղության պայմանագրի ստորագրման համար:
«Տևական ժամանակ Ադրբեջանի հետ աշխատանքը տեղի է ունենում երկկողմ ձևաչափով: Ընդ որում, կարող ենք ասել, որ այդ երկկողմ ձևաչափն այս ընթացքում որոշակի արդյունավետություն է ցույց տվել՝ սկսած նախորդ տարվա դեկտեմբերի համատեղ հայտարարությունից, շարունակած ապրիլի 29–ի հայտարարությամբ: Երեկ էլ սահմանազատման հանձնաժողովների համատեղ աշխատանքի կանոնակարգը ստորագրվեց: Կարծում ենք, որ պետք է կողմնորոշվենք այս հարցում, որովհետև ընդհանուր ըմբռնումը եղել է այն, որ այս փուլում աշխատում ենք երկկողմ ձևաչափով: Քանի դեռ այդ ձևաչափով կարողանում ենք առաջ գնալ, կարծում եմ՝ ճիշտը հենց այդ ձևաչափն է»,–ասաց Փաշինյանը:
Վարչապետն այդ մասին ասել է նաև Ռուսաստանի նախագահին` վերջին հեռախոսազրույցի ընթացքում: Երկկողմ ձևաչափով աշխատելու արձանագրումն անելով՝ Փաշինյանը չի բացառում նաև որևէ այլ ձևաչափով աշխատանքը: Ըստ նրա՝ ամեն կոնկրետ դեպք առանձին հարցի համատեքստում առանձին ժամանակաշրջանում պետք է դիտարկել:
Վարչապետը նկատեց՝ Եվրոպական քաղաքական համայնքի գագաթաժողովի ժամանակ փորձ է արվել տպավորություն ստեղծել, թե Հայաստանը հրաժարվել է հանդիպումից: ՀՀ–ն չի հրաժարվել հանդիպումից:
«Ես ինքս՝ դիվանագիտական խողովակներով, Ադրբեջանի նախագահին առաջարկել եմ, որ տեղի ունենա հանդիպում երկկողմ ձևաչափում, քանի որ նախկին շրջանում փոխադարձաբար եղել է այդ ըմբռնումը, որ մենք այս շրջանում աշխատում ենք երկկողմ ձևաչափում: Կարծում եմ՝ կարող ենք այս տրամաբանությունը շարունակել, քանի որ այս պահի դրությամբ արդյունավետ է»,–ասաց Փաշինյանը:
Ընդ որում, երբ հասունանա բարձրագույն մակարդակում հանդիպում անցկացնելու պահը՝ Փաշինյանը չի բացառում նաև որևէ այլ ձևաչափով հանդիպումը: Նա կարծում է՝ հանդիպումը կարող է տեղի ունենալ նաև Հայաստան–Ադրբեջան սահմանին, այնտեղ, որտեղ սահմանազատման հանձնաժողովներն են հանդիպում:
«Ես պատրաստ եմ նաև այդպիսի շփումների»,–ասաց նա:
The post Փաշինյանը Ալիևին երկկողմ ձևաչափով հանդիպում է առաջարկել first appeared on MediaLab Newsroom-Laboratory.