Բորելը Գազայում եռօրյա հումանիտար հրադադար հաստատելու կոչ է արել
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը կոչ է արել Գազայի հատվածում եռօրյա հրադադար հաստատել պոլիոմիելիտի դեմ պատվաստման արշավ անցկացնելու համար։ Ինչպես հաղորդում է ՌԻԱ Նովոստին, այս մասին Բորելը գրել է Х-ի իր միկրոբլոգում։
«Պոլիոմիելիտի արագ տարածումը սպառնում է Գազայի բոլոր երեխաներին, որոնք առանց այն էլ թուլացել են տեղահանության, զրկանքների և թերսնման պատճառով: Կոչ եմ անում անհապաղ եռօրյա հումանիտար հրադադար հաստատել ԱՀԿ-ի և ՅՈՒՆԻՍԵՖ-ի պատվաստումներն իրականացնելու համար՝ անկախ ավելի լայն բանակցություններից»,- գրել է Բորելը:
Պաղեստինյան տարածքներում Իսրայելի կառավարության համակարգողի գրասենյակը (COGAT) ավելի վաղ հայտնել էր, որ կիրակի օրը պոլիոմիելիտի պատվաստանյութ է առաքվել անկլավ։
ԱՀԿ-ն և ՅՈՒՆԻՍԵՖ-ն ավելի վաղ կոչ էին արել օգոստոսի վերջին և սեպտեմբերին Գազայում 7-օրյա զինադադար հաստատել պատվաստումները սկսելու համար: Պաղեստինյան անկլավում պոլիոմիելիտի դեմ պատվաստումներ իրականացնելու համար հումանիտար հրադադարի կոչ է արել նաև ՄԱԿ-ի գլխավոր քարտուղար Անտոնիու Գուտերեշը: