Երևան քաղաքում տարբեր այգիներում, կանաչ զանգվածներում տարբեր վարձակալության պայմանագրեր տարիներով եղել են խնդրահարույց: Այս մասին գործակարգավարական նիստի ժամանակ ասաց Երևանի քաղաքապետ Տիգրան Ավինյանը:
«Այդ այգիներն այն տեսքի ու նշանակության չեն բերվել, ինչը եղել է իրենց հիմնադրման օրվանից: Պետք է պոտենցիալ վարձակալների հետ բացենք նոր խոսակցություն, այդ այգիները, բացի իրենց բիզնես նպատակներից, նաև մարդկանց համար զբոսնելու համար են: Մենք ինքներս կարող ենք առաջարկել նոր նախագծեր հենց վարձակալներին ու եթե չենք կարողանում համաձայնության գալ, խզենք պայմանագրերը, նոր մրցույթներ հայտարարենք: Մենք դեմ չենք նոր տրամաբանությամբ այդ այգիները տալ վարձակալության, բայց պայմանով, որ նախագծերը կամ մեզ հետ պետք է համաձայնեցվեն, կամ էլ մեր կողմից պետք է ներկայացվեն»,- ասաց Տիգրան Ավինյանը:
