Բայդենը ՆԱՏՕ-ի գագաթնաժողովում ԱՄՆ փոխնախագահին անվանել է Թրամփ
ԱՄՆ նախագահ Ջո Բայդենը Վաշինգտոնում ՆԱՏՕ-ի գագաթնաժողովի փակման ժամանակ շփոթել է ԱՄՆ փոխնախագահ Քամալա Հարիսի ազգանունը՝ նրան անվանելով Թրամփ (հանրապետական Դոնալդ Թրամփը նախագահական ընտրություններում Բայդենի մրցակիցն է-Խմբ.), հայտնում է reuters.com-ը:
Երբ լրագրողները Բայդենին հարցրել են՝ արդյոք նա դուրս կգա նախագահական մրցապայքարից և կզիջի տեղը փոխնախագահ Քամալա Հարիսին, Բայդենը պատասխանել է.«Ես չէի ընտրի փոխնախագահ Թրամփին որպես փոխնախագահ, եթե նա նախագահ լինելու որակներ չունենար»:
Բացի այդ, նույն երեկոյի ընթացքում Բայդենն Ուկրաինայի նախագահ Վլադիմիր Զելենսկիին խոսքը փոխանցելիս նրան ներկայացրել էր որպես «նախագահ Պուտին»:
«Այժմ ուզում եմ խոսքը տալ Ուկրաինայի նախագահին, որը որքան համարձակ է, այնքան էլ վճռական։ Տիկնայք և պարոնայք, նախագահ Պուտին»,- ասել էր Բայդենը։
Նա արագ ուղղել էր իրեն. «Նախագահ Պուտի՞ն: Զելենսկին պետք է հաղթի նախագահ Պուտինին: Ես այնքան կենտրոնացած եմ նախագահ Պուտինին հաղթելու վրա»:
«Ես ավելի լավն եմ»,- կատակել էր Բայդենի կողքին կանգնած Զելենսկին:
«Շատ ավելի լավն եք», - պատասխանել էր ԱՄՆ նախագահը։