Մոսկվայի Բասմանյան դատարանը հեռակա կարգով կալանավորել է ռուս ընդդիմադիր քաղաքական գործիչ Ալեքսեյ Նավալնիի այրուն՝ Յուլիա Նավալնայային «ծայրահեղական համայնքի գործունեությանը մասնակցելու» մեղադրանքով (ՌԴ Քրեական օրենսգրքի 282.1-րդ հոդվածի 2-րդ մաս): Այս մասին հայտնում է ՌԻԱ Նովոստին՝ դատարանի մամուլի ծառայությանը հղումով։
«Դատարանը բավարարել է հետաքննության միջնորդությունը և խափանման միջոց է ընտրել կալանավորումը՝ 2 ամիս ժամկետով։ Ժամկետը հաշվարկվում է Ռուսաստանի Դաշնության տարածք արտահանձնման կամ Ռուսաստանի Դաշնության տարածքում կալանավորման պահից»,- ասել է գործակալության զրուցակիցը։
Գործակալության հաղորդմամբ՝ Նավալնիի այրու նկատմամբ միջազգային հետախուզում է հայտարարվել այն բանի համար, որ նա «թաքնվել է նախաքննական մարմիններից»։
Հիշեցնենք, որ Ալեքսեյ Նավալնին մահացել է փետրվարի 16-ին Յամալ-Նենեցյան ինքնավար օկրուգի Խարպ գյուղի հատուկ ռեժիմի ԻԿ-3 «Բևեռային գայլ» գաղութում։ Նրա մահվան մասին եզրակացության մեջ նշվում է, որ քաղաքական գործիչը մահացել է բնական մահով։ Այլ մանրամասներ չեն հաղորդվում։ Քաղաքական գործչի կողմնակիցները կարծում են, որ նա սպանվել է։ Քաղաքական գործչի այրին՝ Յուլիան, խոստացել է շարունակել ամուսնու գործը։
