«Մեդիալաբի» հարցերին պատասխանում է թուրքագետ Հակոբ Չաքրյանը
– Պարո՛ն Չաքրյան, ՀՀ արտգործնախարարը հայտարարել է, որ Հայաստանը պատրաստ է Թուրքիայի հետ դիվանագիտական հարաբերությունների հաստատման հարցում, որ ժամանակն է սահմանները բացելու։ Այս հայտարարությունն ինչպե՞ս եք գնահատում, եթե նկատի ունենանք այն, որ սահմանը փակել է ոչ թե Հայաստանը, այլ Թուրքիան։
– Հիմա Էրդողանի դիրքորոշումը փոխվել է, որովհետև իրավիճակն է փոխվել, ելնելով այն հանգամանքից, որ ԵՄ-ն՝ ի դեմս Ֆրանսիայի, Գերմանիայի ու մյուս երկրների, նաև ԱՄՆ-ի բարերար ազդեցությամբ՝ Հայաստանի հանդեպ սկսել է մեղմ քաղաքականություն վարել Թուրքիան, այսինքն՝ թշնամանքից գուցե չի հրաժարվել, բայց, համենայնդեպս, թշնամական հայտարարություններով հանդես չի գալիս։
Այսինքն՝ ԱՄՆ-ն ու ԵՄ-ն նրան կարգի են բերել, ու հասկացել է, որ չի կարող երկար ժամանակ հակադրվել և՛ ԱՄՆ-ին, և՛ ԵՄ-ին։ Այս համատեքստում Արարատ Միրզոյանը, փաստորեն, ընդառաջում է վերջիններիս հայաստանանպաստ գործունեությանը իր հայտարարությունով։
– Իսկ Թուրքիան կգնա՞ այդ պայմանավորվածությունների կատարմանը։
– Եթե անգամ չգնա էլ, մենք մեր քայլն անում ենք, թող մերժողի դերում լինի Թուրքիան։ Համենայնդեպս, քանի դեռ կա ԱՄՆ-ի ու ԵՄ-ի աջակցությունը, մենք վախենալու շատ բան չունենք։
– Պարո՛ն Չաքրյան, Միրզոյանն ասել է նաև, որ Հայաստանը Թուրքիայի հետ հարաբերությունները չի դիտարկում Ադրբեջանի հետ հարաբերությունների կոնտեքստում, այլ առանձին։ Ճի՞շտ է նման քաղաքականություն որդեգրել այն պարագայում, երբ նույն Թուրքիան բազմիցս ասել է, որ ինքը դա դիտարկում է Ադրբեջան-Հայաստան հարաբերությունների կոնտեքստում։
– Այո՛, Թուրքիան դա բազմիցս հայտարարել է, բայց վերջին շրջանում դադարեցրել է դա, երևի Իսրայելի հետ կապված Իլհամը զայրացրել է Էրդողանին, երբ վերջինս Իսրայելին մեղադրում է ցեղասպանության համար, իսկ Ալիևը նրա հետ նորանոր համաձայնություններ է կնքում։
Բայց խնդիրը դա չէ, Հայաստանի՝ ԱՄՆ-ից ու Եվրոպայից ստացած միջազգային աջակցությունը կաշկանդում է Թուրքիային։ Արարատ Միրզոյանը ճիշտ է արել, փաստորեն Թուրքիայի առաջ հորիզոն է բացել, որ նոր քայլեր կատարի, եթե չկատարեց՝ պարզ կդառնա, որ Էրդողանն անկեղծ չէ։
– Ձեր գործընկերներից ոմանք նշում են, որ եթե Ադրբեջանը պատերազմական գործողություններ սանձազերծի Հայաստանի դեմ, ապա Թուրքիան նրան չի օգնի։ Թուրքիան երբևէ մենակ կթողնի՞ իր եղբայր Ադրբեջանին։
– Ադրբեջանը հիմա չի կարող նման քայլի դիմել, որովհետև, արդեն ասացի, Հայաստանի նկատմամբ միջազգային աջակցության մասին, բայց Թուրքիան չի թողնելու Ադրբեջանին մենակ։
Քրիստինե Աղաբեկյան
MediaLab.am
The post Մենք մեր քայլն անում ենք, թող մերժողի դերում լինի Թուրքիան. Չաքրյանը՝ Արարատ Միրզոյանի հայտարարությունների մասին first appeared on MediaLab Newsroom-Laboratory.
