ԱՄՆ նախագահի թեկնածուներ Ջո Բայդենի և Դոնալդ Թրամփի միջև կայացել է առաջին հեռուստաբանավեճը. հեռուստադիտողների 67%-ի կարծիքով՝ հանրապետական թեկնածուն գերազանցել է գործող նախագահին. այս են վկայում CNN-ի հարցման արդյունքները։
Համաձայն դրա արդյունքների՝ հեռուստադիտողների միայն 33%-ն է կարծում, որ Ջո Բայդենն ավելի լավ է հանդես եկել, քան իր մրցակիցը։
CNN-ը նշում է, որ հարցման արդյունքները չեն արտացոլում բոլոր ընտրողների կարծիքը: Ընդ որում, հեռուստաալիքը և նրա լսարանը համարվում են Դեմոկրատական կուսակցության համակիրներ։
Հեռուստաալիքի տվյալներով՝ բանավեճից առաջ ընտրողները (55% ընդդեմ 45%) ասել են, որ ակնկալում են, որ Դոնալդ Թրամփը ավելի լավ հանդես կգա, քան ԱՄՆ ներկայիս նախագահը։
Նշենք, որ Բայդեն-Թրամփ հեռուստաբանավեճի ընթացքում հնչել են սուր հայտարարությունները
«Ցանկանո՞ւմ եք երրորդ աշխարհամարտը սկսվի, ուրեմն՝ թույլ տվեք Թրամփին հաղթել ընտրություններում», - ասել է Բայդենը:
Մինչդեռ Թրամփը հակադարձել է, որ «եթե Բայդենը վերընտրվի, ԱՄՆ-ից, որպես երկիր, ոչինչ չի մնա»: Ըստ հանրապետականի՝ «նա ԱՄՆ պատմության մեջ վատագույն նախագահն է»:
«Մեր ուժը դաշինքի մեջ է, իսկ Թրամփը ցանկանում է մեզ ՆԱՏՕ-ից հանել», - շարունակել է Բայդենը:
Թրամփն էլ ասել է, որ «եթե ունենային իսկական նախագահ, նախագահ, որին ՌԴ նախագահ Վլադիմիր Պուտինը կհարգեր, նա երբեք չէր ներխուժի Ուկրաինա»:
Տեսանյութերը կարող եք դիտել Tert.am-ի թելեգրամյան ալիքում:
