Թուրքիայի իշխանությունները ստորագրել են ամերիկյան կողմի ուղարկած առաջարկի ընդունման նամակը (Letter of Acceptance)՝ կապված նոր F-16 Block-70/72 կործանիչների գնման և առկա ինքնաթիռների արդիականացման հետ: Խոսքը 23 միլիարդ դոլար արժողությամբ ծրագրի մասին է: Այս մասին հայտարարել է ԱՄՆ Պետքարտուղարությունը՝ այս փաստն անվանելով «լուրջ քայլ առաջ» գործարքի իրականացման ուղղությամբ։
Նոր կործանիչների ձեռքբերման և հների արդիականացման մասին համաձայնագրի իրականացման վերաբերյալ առաջարկի նախագիծը և հաստատման նամակներն Անկարան Վաշինգտոնից ստացել է 2024 թվականի փետրվարին։ Գործարքն ինքնին հավանության է արժանացել ամերիկյան իշխանությունների կողմից հունվարին։
Ընդհանուր առմամբ, Թուրքիան նախատեսում է գնել 40 F-16 Block-70/72 կործանիչ՝ մեկ նստատեղով (F-16C) և երկտեղանոց (F-16D) տարբերակներով, ինչպես նաև 79 սարքավորումների հավաքածու, որոնք անհրաժեշտ են արդիականացնելու և ընդլայնելու համար թուրքական F-16C/D Block-40/50+ ինքնաթիռների ծառայության ժամկետը:
