ՌԴ Քննչական կոմիտեն Ռուսաստանի զինված ուժերի կապի գլխավոր վարչության ղեկավար, ԳՇ պետի տեղակալ Վադիմ Շամարինին մեղադրում է 36 միլիոն ռուբլու չափով կաշառք ստանալու համար։ Այս մասին հայտնել է ՌԴ Քննչական կոմիտեի պաշտոնական ներկայացուցիչ Սվետլանա Պետրենկոն, փոխանցում է ՏԱՍՍ-ը:
«Հետաքննության համաձայն՝ 2016 թվականի ապրիլից մինչև 2023 թվականի հոկտեմբեր ընկած ժամանակահատվածում Շամարինը 36 միլիոն ռուբլու չափով կաշառք է ստացել Պերմի հեռախոսային գործարանի՝ Տելտա ԲԲԸ-ի գլխավոր տնօրեն Ալեքսեյ Վիսոկովից և նույն ընկերության գլխավոր հաշվապահ Ելենա Գրիշինայից՝ Ռուսաստանի պաշտպանության նախարարության կարիքների համար պետական պայմանագրերով մատակարարվող ապրանքների ծավալը մեծացնելու և ընդհանուր հովանավորչության համար»,- ասել է նա։
Պետրենկոյի խոսքով՝ Շամարինն իր հայեցողությամբ է օգտագործել ստացած գումարը։
Շամարինին սպառնում է առավելագույն 15 տարվա ազատազրկում՝ կաշառքի հարյուրապատիկի չափով տուգանքով։
Նշենք, որ ՌԴ ՊՆ-ում շարունակվում է պաշտոնյաների ձերբակալման ալիքը: Ավելի վաղ ձերբակալվել էին պաշտպանության փոխնախարար Թիմուր Իվանովը և պաշտպանության նախարարության կադրային գլխավոր վարչության պետ, գեներալ-լեյտենանտ Յուրի Կուզնեցովը։ Նրանք երկուսն էլ մեղադրվում են առանձնապես խոշոր չափերով կաշառք ստանալու համար:
Յուրի Կուզնեցովը մեղադրվում է 30,5 միլիոն ռուբլու կաշառք ստանալու համար։ Տիմուր Իվանովը մեղադրվում է 1,185 միլիարդ ռուբլի ստանալու համար։
Մայիսի 17-ին խարդախության գործով ձերբակալվել էր Հարավային ռազմական օկրուգի 58-րդ բանակի նախկին հրամանատար Իվան Պոպովը:
