21 ноябрь (шимбә). Сәфәр аеның 9 нчы көне. 11 нче Ай тәүлеге. Ай Кучкар йолдызлыгында, 13.39 сәгатьтә калка, 0.45 сәгатьтә бата. 2 нче фаза. Көн озынлыгы 7.59 сәгать.
Үзгәрү, сафлык, катгыйлык көне. Һәр эштә дә сак һәм игътибарлы булу сорала. Башланган эшне ахырына җиткерергә кирәк. Бу көннең энергетик куәте бик зур, кешедә искиткеч табигый көч уянырга мөмкин. Арып-талганчы эшләргә ярамый. Сизү әгъзалары, йөрәк, умырткалык, үпкә зәгыйфь.
Инсульттан соң (1)
5 аш кашыгы вакланган чыршы, нарат яки артыш ылысын ярты литр суда кайнатып чыгарып, сүрән утта 10 минут пешерәләр, җылы урында 6-8 сәгать төнәткәч, сөзеп, көненә 3 тапкыр, ашар алдыннан, 1 әр стакан эчәләр. Яки 1 стакан кипкән гөлҗимеш тамырын 3 литр суда 20 минут пешерәләр, 10 минут төнәткәч, сөзеп, ваннадагы суга кушалар һәм 10-15 минутка шунда кереп яталар. Көнаралаш шундый 20-30 процедура кирәк.
22 ноябрь (якшәмбе). Сәфәр аеның 10 нчы көне. 12 нче Ай тәүлеге. Ай Кучкар йолдызлыгында, 14.04 сәгатьтә калка, 2.07 сәгатьтә бата. 2 нче фаза. Көн озынлыгы 7.55 сәгать.
Шәфкать, сабырлык, мәхәббәт энергиясенә бай көн. Сәламәтлеккә игътибарлы булырга, йөрәккә киеренкелек китермәскә кирәк. Ашкайнату әгъзалары, кан әйләнеше системасы зәгыйфь. Дарулар яхшы үзләштерелә.
Инсульттан соң (2)
30 грамм вакланган дәфнә (лавр) яфрагын 1 стакан көнбагыш маена салып, көн саен болгатып, җылы урында 2 ай төнәтәләр, сөзеп, кайнатып чыгаралар. Параличланган урыннарга көн саен сөртәләр. 100 әр грамм ромашка чәчәге, сары мәтрүшкә үләне, ак әнеч (тмин) орлыгы, каен бөресен кушып, шул катнашманың 1 аш кашыгын 2,5 стакан кайнар суда кайнатып чыгаралар, сөзәләр, җылы килеш, иртән ашарга 20 минут кала һәм кичен 1әр стакан төнәтмәне 1 чәй кашыгы бал белән эчәләр. Катнашма беткәнче дәвалангач, тагын 6 айдан һәм 1 елдан соң дәва курсын кабатлыйлар.
23 ноябрь (дүшәмбе). Сәфәр аеның 11 нче көне. 13 нче Ай тәүлеге. Ай Үгезбозау йолдызлыгында, 14.31 сәгатьтә калка, 3.30 сәгатьтә бата. 2 нче фаза. Көн озынлыгы 7.52 сәгать.
Үзгәрешләр көне. Үткәннәр турында уйланып, нәтиҗәләр ясау яхшы. Ач торырга ярамый – теләсә нәрсә ашарга була. Аралашу, белем алу өчен уңай вакыт. Йөрәк, тире, кан тамырлары зәгыйфь. Чикләвек ашау файдалы.
Кан тамырларына ярдәм
Кан тамырлары варикоз киңәйгәндә, көненә 2 тапкыр мондый катнашма сөртү файдалы: 1 аш кашыгы ромашка сыгынтысына (экстракт) 1 чәй кашыгы алтын мыек (каллизия) төнәтмәсен кушалар. Төнәтмә болай әзерләнә: алтын мыек гөленең 1 яфрагын 1 литр кайнар суда тәүлек буе төнәтәләр, сөзеп, карасу төстәге пыяла савытка салалар һәм суыткычта саклыйлар.
24 ноябрь (сишәмбе). Сәфәр аеның 12 нче көне. 14 нче Ай тәүлеге. Ай Үгезбозау йолдызлыгында, 15.01 сәгатьтә калка, 4.54 сәгатьтә бата. 2 нче фаза. Көн озынлыгы 7.49 сәгать.
Иң әһәмиятле эшкә тотыну өчен уңайлы көн. Бүген башланган эш бик яхшы тәмамланачак. Теләсә нинди вак-төяккә игътибарлы булу сорала. Эчәклек һәм тирене чистарту уңай нәтиҗә бирә. Ашказаны асты бизе зәгыйфь. Балан, фасоль, борчак, арпа ашау файдалы.
25 ноябрь (чәршәмбе). Сәфәр аеның 13 нче көне. 15 нче Ай тәүлеге. Ай Игезәкләр йолдызлыгында, 15.36 сәгатьтә калка, 6.16 сәгатьтә бата. 2 нче фаза. Көн озынлыгы 7.45 сәгать.
Авыр энергетикалы көн. Бүген кеше үз нәфесенең теләк һәм коткыларына бигрәк тә бирешүчән.Тыелгысыз хисләр күңелсез вакыйгаларга китерергә мөмкин. Тәэсирләнүчән кешеләргә аеруча кыен. Алма, кәбестә, сарымсак ашарга ярамый, балан, мүк җиләге, кычыткан ашау файдалы.
Йөрәккә дәва
Брадикардия булса (йөрәк минутына 50-55 тапкыр гына типсә), болай дәваланып карарга була. 10 лимонның согын сыгалар, 10 баш сарымсакны чистартып изәләр, шуңа 1 литр бал кушып, әйбәтләп болгаталар, пыяла банкада салкынча караңгы урында 10 көн төнәтәләр, көн саен болгаткалап куялар. Иртән, ашарга 30 минут кала, 1 аш кашыгы катнашманы авызга кабып, әкренләп суыралар. Әзерләгән дару беткәнче шулай дәваланалар. Тагын 1 елдан соң кабатларга ярый.
26 ноябрь (пәнҗешәмбе). Сәфәр аеның 14 нче көне. 16 нчы Ай тәүлеге. Ай Игезәкләр йолдызлыгында, 16.19 сәгатьтә калка, 7.32 сәгатьтә бата. 2 сәгать 45 минуттан тулы Ай. Көн озынлыгы 7.42 сәгать.
Тыныч, иҗади, уңышлы көн. Һәрнәрсәдә гармониягә омтылу, җан тынычлыгын саклау мөһим. Дулкынландыргыч очрашулар булырга мөмкин. Килешүләр төзү уңай нәтиҗә бирә. Кан авырулары кискенләшә. Беркемгә дә үпкә сакларга ярамый.
Анемиядән – чикләвекле бал
Кандагы гемоглобин микъдарын күтәрү өчен, 1 әр стакан кара җимеш, әстерхан чикләвеге һәм йөземне иттарткычтан чыгаралар, 1 стакан бал кушып болгаталар да, ашар алдыннан 1 әр чәй кашыгы кабалар.
27 ноябрь (җомга). Сәфәр аеның 15 нче көне. 17 нче Ай тәүлеге. Ай Кысла йолдызлыгында, 17.10 сәгатьтә калка, 8.41 сәгатьтә бата. 3 нче фаза. Көн озынлыгы 7.39 сәгать.
Мәхәббәт, иҗат, яшәү шатлыгы көне. Бернәрсә дә планлаштырмыйча, теләгән нәрсәләрне генә эшләү яхшы. Нерв һәм эндокрин системаларга, күзләргә игътибарлырак булу сорала. Үпкәләшкән кешеләр белән дуслашыр вакыт. Яшелчәләрне күбрәк ашау файдалы.
Лимонлы коймак
160 грамм он, 2 йомырка, 1 лимон, 60 грамм атланмай, 70 миллилитр сөт, 120 грамм каймак, 25 грамм шикәр, 10 грамм камыркүперткеч яки сода, кыздырыр өчен зәйтүн мае кирәк. Атланмайны эретәләр, лимонның цедрасын кырып алалар, яртысының согын сыгалар. Каймак, он, камыркүперткеч, шикәр, йомырка, сөттән камыр туглыйлар, шуңа атланмайны һәм лимон согы белән цедрасын кушалар. Зәйтүн маенда кыздыралар.
