Ռումինիայի մայրաքաղաք Բուխարեստում ավարտին մոտեցող ծանրամարտի Եվրոպայի Մ20 և Մ23 առաջնությունում Լիանա Գյուրջյանը (87 կգ) նվաճեց չեմպիոնի կոչումը, իսկ Պետրոս Պետրոսյանը (109 կգ) դարձավ փոխչեմպիոն։
Մինչև 23 տարեկանների պայքարում Լիանա Գյուրջյանը երկամարտում գրանցեց 221 կգ (96+125)՝ փոքր ոսկե մեդալներ նվաճելով նաև պոկում ու հրում վարժություններում։ Նա 5 կգ գերազանցեց երկրորդ տեղը գրաված ռումինացի Ալեքսանդրա Ալեքսիին։
Նույն տարիքային խմբի տղամարդկանց պայքարում Պետրոս Պետրոսյանը 1 կգ զիջեց չեմպիոնի կոչումը նվաճած վրացի Զազա Լոմտաձեին (371 կգ, 161+210) և դարձավ արծաթե մեդալակիր։ Երկամարտում Պետրոս Պետրոսյանի արդյունքն էր 370 կգ (163+207)։ Պոկում վարժությունում հայ ծանրորդը նվաճեց փոքր ոսկե մեդալ, իսկ հրումում երկրորդն էր։
Հիշեցնենք, որ այս տարվա ապրիլին Երևանում կայացած Եվրոպայի մեծահասակների առաջնությունում Պետրոս Պետրոսյանը երկամարտի 379 կգ (165+214) արդյունքով դարձել էր բրոնզե մեդալակիր։
Ավելի վաղ Հայաստանի ներկայացուցիչներից Ռաֆիկ Հարությունյանը (81 կգ, Մ23), Գառնիկ Չոլակյանը (61 կգ, Մ23), Սուրեն Գրիգորյանը (89 կգ, Մ20) և Գարիկ Կարապետյանը (102 կգ, Մ20) հռչակվել էին Եվրոպայի չեմպիոն: Կարեն Մարգարյանը (81 կգ) դարձել էր Եվրոպայի Մ23 փոխչեմպիոն, մինչև 20 տարեկանների պայքարում Տիգրան Կարապետյանը (67 կգ), Գոռ Սահակյանը (73 կգ) և Էմմա Պողոսյանը (81 կգ) նվաճել էին արծաթե մեդալ, իսկ Ալեքսանդրա Գրիգորյանը (58 կգ), Սեյրան Խուդանյանը (55 կգ), Մերուժան Եղոյանը (61 կգ), Մարտին Պողոսյանը (73 կգ), Մնացական Աբրահամյանը (81 կգ) և Ջուլիետա Ավանեսյանը (+87 կգ) դարձել էին բրոնզե մեդալակիր։
The post Լիանա Գյուրջյանը՝ Եվրոպայի Մ23 չեմպիոն, Պետրոս Պետրոսյանը 1 կգ զիջեց հաղթողին appeared first on ԳԱԼԱ.
