Մայիս 28-ով կերտված Հայաստանի Հանրապետությունը Ցեղասպանության արհավիրքից հետո հայոց հրաշափառ հարությունն էր: Մեր նորագույն պատմության մեծագուն հաղթանակն է Մայիսի 28-ը, որով ապահովվեց մեր ժողովուրդի գոյատևումը և աշխարհի քարտեզին վերադարձած իր անկախ հայրենիքի մեջ ապրելու և զարգանալու հնարավորությունը: Այս մասին հայտարարեց ՀՅԴ Բյուրոյի ներկայացուցիչ Հակոբ Տեր-Խաչատուրյանի ելույթը պետականության վերականգնման 105-ամյակին նվիրված միջոցառման ժամանակ՝ խոսելով Հայ Հեղափոխական Դաշնակցության իշխանության օրոք Հայաստանի Առաջին Հանրապետության հռչակման մասին։
«Օրհասական այդ օրերին հայ ժողովուրդը կարողացավ զարթնեցնել իր մեջ այն ուժականությունը, որ խիզախ և ներշնչող հայրենակերտ ղեկավարների առաջնորդությամբ, հայությունը վերածեց երկաթյա բռունցքի»,- ընդգծեց նա
«Այսօր էլ հայրենիքը ճգնաժամի մեջ է, բայց երբեմնի հայրենանվեր իշխանության փոխարեն ունենք պարտվողական, հանձնվողական և իր էությամբ դատարկ պետական ղեկավարություն։ 1918-ի առաջնորդները նվիրումով և անսասան հավատքով տոգորված պատասխանատու անձինք էին, որոնք գերագույն զոհողությունների գնով անհնարինը հնարավոր են դարձրել։ Այսօր էլ լուծումը նույնն է՝ մենք պարտավոր ենք հավատալ մեր ուժերին, հաղթահարել հիասթափությունները և մերժել մեզ պարտադրված կեղծ արժեքներն ու օրակարգերը»,- նշեց նա։
