Бишкекдаги Биринчи май туман суди Қирғизистоннинг собиқ президенти Алмазбек Атамбаевга даволаниш учун мамлакатдан ташқарига чиқишга рухсат берган. Бу ҳақда Озодликнинг қирғиз хизмати хабар қилди.
Аввалроқ Атамбаев коррупцияга оид айблов билан 11 йилга озодликдан маҳрум қилинган эди.
Атамбаевнинг оила аъзолари ТАСС агентлигига собиқ президент қамоқхонадан озод қилинганини маълум қилишган. Бу маълумотни Атамбаевнинг сафдошлари ҳам тасдиқлашган.
Куни кеча Қирғизистон Олий суди коллегияси ёпиқ мажлисда Алмазбек Атамбаевга қарши очилган жиноят ишини қайта кўриб чиқиш тўғрисида қарор қабул қилган эди. Унга нисбатан Олий суднинг 2021 йил 12 октябридаги ҳамда 2022 йил 15 мартидаги қарорлари бекор қилинган.
2020 йили Олий суд Атамбаевни 11 йилга қамаш тўғрисидаги қуйи инстанция судларини бекор қилган эди. Ўшанда иш қайта кўриб чиқиш учун Биринчи май туман судига йўлланган. Бироқ 2021 йилнинг 12 октябрида Бош прокуратура талабномасидан кейин Олий суд ўз қарорини бекор қилган. 2022 йил 15 март куни Олий суд Атамбаевни 11 йилга озодликдан маҳрум қилиш тўғрисидаги ҳукмни ўз кучида қолдирган. Мазкур жиноят иши судда айбланувчи ўлароқ иштирок этган 10 дан ортиқ одам ичида фақат Атамбаевгагина реал қамоқ жазоси берилган.
Алмазбек Атамбаев Қирғизистонни 2011 йилдан 2017 йилгача бошқарган. 2019 йил августида милиция махсус отряди собиқ президентнинг уйини штурм қилган, унинг ўзини эса тутиб кетган. Кейинги йил июлида у 11 йилга қамалган. 2020 йил 6 октябрига ўтар кечаси Бишкекда бўлиб ўтган норозилик намойиши ортидан Атамбаев Миллий хавфсизлик давлат қўмитаси тергов ҳибсхонасига бостириб кирган намойишчилар томонидан озод қилинган эди. Ўша воқеадан бир неча кун ўтгач, собиқ президент яна ушланган.
Атамбаевга қарши оммавий норозилик чиқишларини уюштириш, ҳуқуқ-тартибот идоралари ходимларига қарши зўравонлик, ноқонуний паспорт берганлик ва коррупция дохил бир неча жиноят иши очилган. Собиқ президент бу жиноят ишларини доим “сиёсий таъқиб” унсури эканини иддао қилиб келган.
