Tert.am-ի զրուցակիցը ARCADA Construction ընկերության տնօրեն Տիգրան Բայբուրտյանն է, ով հարցազրույցում ներկայացրել է ընկերության անցած ուղին, իրականացրած նախագծերն ու առաջիկա ծրագրերը:
- Պարոն Բայբուրտյան, հարցազրույցի սկզբում առաջարկում եմ խոսենք ARCADA Construction կառուցապատող ընկերության պատմության, անցած ուղու և գաղափարի մասին։
- Իրականում ընկերությունն իր գործունեությունը սկսել է դեռ 1997 թվականին, սակայն սկզբում այն այլ գործունեությամբ էր զբաղվում, հիմնականում՝ տրանսպորտի ոլորտում։ Միայն վերջին 3 տարիների ընթացքում ընկերությունն իր գործունեության ոլորտը փոխեց և սկսեց զբաղվել կառուցապատմամբ: Հաշվի առնելով շուկայում տիրող վիճակը և այն հանգամանքը, որ առհասարակ առողջ բիզնեսը տրանսֆորմացիաների ենթարկվելու պոտենցիալ պետք է ունենա՝ մեր ընկերությունն իր գործունեությունը տեղափոխեց շինարարության ոլորտ, ինչը, կարծում եմ, բավականին արդյունավետ և լավ է ստացվում՝ հաշվի առնելով թե՛ մեր վաճառքները, թե՛ կառուցվող շենքերի որակը, թե մնացած բոլոր
հանգամանքները:
- Ընկերության գործունեության ընթացքում որո՞նք են եղել որդեգրած առաջնային նպատակները, որոնց անշեղորեն հետևում եք։
- Ինչպես արդեն տարբեր առիթներով նախկինում խոսել ենք, հիմա էլ պետք է նշեմ, որ մեզ համար միանշանակ առաջնահերթություն է անվտանգության կոմպոնենտը, սա վերաբերում է նաև շենքերի՝ հետագա տարիների անվտանգությանը: Այսինքն՝ սեյսմիկ տեսանկյունից շատ հետևողական ենք, դեռ մի բան էլ շենքերն ավելի ամուր են կառուցվում, քան պահանջում են սեյսմիկ նորմերը: Անկասկած մեր ուշադրության կենտրոնում է նաև շինարարության ընթացքում աշխատակիցների անվտանգության հարցը: Նշվածներն, իհարկե, անվտանգության երկու տարբեր բաղադրիչներ են, բայց հստակ անվտանգությունը շատ կարևոր բաղադրիչ է շինարարության մեջ։
Կարծում եմ՝ դա այն առաջնային նպատակներից է, որին դժվար թե երբևէ դավաճանենք։ Երկրորդը կարող եմ նշել խոստումների իրականացումը, այսինքն՝ իրականում թե՛ օբյեկտիվ, թե՛ սուբյեկտիվ պատճառներով շինարարության մեջ ստացվում է այնպես, որ ինչ-որ ժամկետ խախտվում է, ինչպես գիտեք, օբյեկտիվ պատճառներ վերջին տարիներին շատ եղան՝ 44-օրյա պատերազմ, ռազմական բախումներ, կորոնավիրուսի համավարակ։ Սուբյեկտիվ պատճառներ բնականաբար ևս լինում են. դարձյալ շատ զանազան ու բազմաշերտ: Այնուամենայնիվ այստեղ խոստում ասելով՝ ես նկատի չունեմ հստակ ժամկետներ և բառացի-տառացի այն, ինչը մենք ասել ենք, այլ նկատի ունեմ այն, որ այն ամենը ինչը մենք խոստանում ենք, միանշանակ իրականություն է դառնում: Բնականաբար բնակիչներին ամենաշատ հուզող և անհանգստացնող հարցերից մեկը հենց դա է, ուստի թե՛ սեփականատերերի, թե՛ անձամբ իմ, թե՛ ամբողջ ընկերության գաղափարի հիմքում դրված է այս գաղափարը՝ մենք մեր խոսքի տերն ենք։
- Ձեր ֆեյսբուքյան էջում պարբերաբար ներկայացվում են վիդեոհաշվետվություններ կատարվող նախագծերից: Անդրադառնանք նաև այդ նախագծերին։ Այս ընթացքում ի՞նչ նախագծեր են կյանքի կոչվել ձեր կողմից և ո՞րոնք են այս պահի ընթացիկ խոշոր նախագծերը։
- Նախորդ 2022 թվականին ավարտին հանձնվեց «Գրինվիլ» թաղամասը, որը գտնվում է Դավթաշեն համայնքում: Այն բաղկացած է 9 մասնաշենքից՝ հինգ հարկանի գեղեցիկ, փակ, բնակելի թաղամաս։ Կարծում եմ՝ նախադեպը չունեցող պրոյեկտ էր, որով մենք մեր առաջին քայլերը արեցինք և մուտք գործեցինք կառուցապատման ոլորտ։ Այս պահին ունենք ևս երկու համալիր, որոնք կառուցման փուլում են. «Արտհաուս» բնակելի թաղամասը՝ 9-հարկանի երկու մասնաշենքից բաղկացած և «Գրիբոյեդով պարկ» համալիրը, որը 6 մասնաշենքից բաղկացած, բավականին մեծ, 800-ից ավելի բնակարան ունեցող համալիր է: Սրանց ավարտը նախատեսվում է այս տարի։ Հուսով ենք՝ շեղումներ շատ չենք ունենա, չնայած՝ արդեն իսկ երևում է, որ մի փոքր ժամկետի տատանում կլինի։ Այնուամենայնիվ, բոլոր ջանքերը ներդրվում են՝ խոստացված ժամկետներում պրոյեկտները ավարտելու համար:
- Ընկերության կողմից նախագծված ու գնորդին առաջարկվող համալիրները ի՞նչ հիմնական առավելություներ ունեն, ինչո՞վ են առանձնանում շուկայում առկա այլ առաջարկներից:
- Այս հարցին պատասխանելու համար մի փոքր հեռվից սկսեմ. երբ, կոպիտ ասած, ունենում ենք ազատ հող, այն ներկայացվում է տարբեր ճարտարապետների կամ ճարտարապետական ընկերությունների, տենդեր է կազմակերպվում այդտեղ կառուցվելիք պրոյեկտի համար, և հենց այդ փուլում մեզ համար նախընտրելի են դառնում այն նախագծերը, որոնք տարբերվող են: Մենք ցանկանում ենք այնպիսի նախագիծ ընտրել, որը բացառիկ է թե՛ իր հարմարավետությամբ, անվտանգությամբ, ինչպես «Գրինվիլ»-ի դեպքում էր, թե՛ ճարտարապետական արժեքով: Օրինակ՝ «Գրիբոյեդով պարկ» համալիրն ամբողջ տարածաշրջանում ամենամեծ կամար ունեցող պրոյեկտն է: Դրանով այն դառնում է շատ բացառիկ, թեպետ պետք է նշեմ, որ իր ընդհանուր ճարտարապետական տեսքն էլ բավականին հարուստ է: Եթե չեմ սխալվում, հենց այդ պրոյեկտի համար ճարտարապետ Ցոլակ Մհերյանն արժանացել է Ճարտարապետների միության հատուկ շնորհակալագրի: Այսինքն՝ մենք չենք ուզում հերթական այսպես կոչված, «տուփը» կառուցել, այլ ուզում ենք, որ մեր անունն ասոցացվի գեղեցիկի, ճարտարապետական արժեքի, հարմարավետության և անվտանգության հետ:
- Խոսենք նաև առաջիկա ծրագրերի մասին: Ի՞նչ նոր նախագծեր սպասենք «Արկադա Քոնսթրաքշն» կառուցապատող ընկերության կողմից:
- Այս պահին ծրագրում ենք 2 պրոյեկտ: Մասնավորապես՝ Ծաղկաձորում բավականին մեծ համալիր ենք ուզում կառուցել, որն առայժմ նախագծման փուլում է: Այստեղ ևս ուզում ենք տարբերվող մի բան ստեղծել։ Նախագծում ներառել ենք ժամանցային բազմաթիվ վայրեր, որոնք այդ տարածքում չկան: Ավելի մանրամասն նախագծումից ՝ հետո:
Երևանի Քանաքեռ-Զեյթուն համայնքում՝ «Գազպորմ»-ի անմիջապես դիմաց բավականին մեծ պրոյեկտ ենք իրականացնելու: Այս պահին ավելի իրատեսական են նշածս երկու պրոյեկտները, բայց բնականաբար մենք շուկային հետեւում ենք, պարբերաբար ստանում ենք առաջարկներ, քննարկում ենք դրանք և չի բացառվում, որ առաջիկայում որևէ նոր նախագծի սկիզբ եւս ազդարարենք: Այնպես որ «Արկադա»-ից նոր սպասելիքներ միշտ ունեցեք:
- Շուկայում ո՞րն է «Արկադա Քոնսթրաքշն» ընկերությանն առանձնացնող և եզակի դարձնող հատկանիշը։
- Քանի որ պրոյեկտների մասին առանձին խոսեցինք, կարող եմ ասել, որ «Արկադա Քոնսթրաքշն» ընկերությունում հավաքված են եռանդուն, տարիքային միջին և ավելի երիտասարդ խմբի աշխատակիցներ, ինչը աշխատանքը դարձնում է բավականին արդյունավետ և հետաքրքիր։ Ճիշտն ասած՝ չգիտեմ՝ ուրիշ ընկերություններում նման մոտեցում կա, թե ոչ, բայց մեզ համար որպես հատուկ և կարեւոր կոմպոնենտ, կցանկանայի դա նշել։
- Ի՞նչին պետք է ուշադրություն դարձնեն գնորդները անշարժ գույք գնելիս եւ ի՞նչ խորհուրդներ կտաք նրանց ընկերության կողմից։
- Իրականում գույքի ընտրության հարցում նախասիրությունները շատ տարբեր են, օրինակ՝ մարդիկ կան, որ ուզում են տունն արևկող չլինի, մյուսները հակառակն են սիրում, մարդիկ էլ կան, որ ուզում են շատ լույս լինի. նախասիրությունները շատ տարբեր են և այս հարցում դրանք մեծ դեր ունեն, բայց բնականաբար ամենակարևոր բանը, եթե վերադառնանք մեր առաջին հարցի առաջին կետին, անվտանգությունն է։ Այսինքն՝ պետք է վստահ լինել, որ շենքերը կառուցվում են բոլոր նորմատիվներին համապատասխան, այն մարդիկ, որոնք կանգնած են այդ ամենի հետևում, ունեն անցած ճանապարհ, փորձ, հեղինակություն, որը թույլ չի տա իմ նշած նորմատիվները խախտել։
- Այսօր Հայաստանում, հատկապես Երևանում անշարժ գույք գնելը դարձել է թանկ հաճույք: Ի՞նչ գնային քաղաքականություն ունի Ձեր ընկերությունը և ի՞նչ հնարավորություններ կարող է առաջարկել բնակարան գնել ցանկացող բոլոր անձանց:
- Մենք աշխատում ենք շուկայում գործող հնարավոր բոլոր տարբերակներով՝ թե՛ բանկերի միջոցով, թե՛ եկամտային հարկի վերադարձի տարբերակով, և թե՛անմիջապես կառուցապատողից տարաժամկետ վճարումների տարբերակով։ Աշխատում ենք հիմնականում երեք բանկերի հետ, որոնք շուկայում դիրքավորված խոշոր բանկերից են։ Գնային քաղաքականությունը, կարծում եմ, որակ և գին հարաբերակցության մեջ բավականին կշռված է, այսինքն՝ արհեստական ուռճացված կամ ինչ-որ հատուկ էժանացված գին չէ։ Այդուհանդերձ, ամեն նոր պրոյեկտի համար առանձին դիտարկվում, քննարկվում և ուսումնասիրվում է շուկան և արդեն ըստ դրա ձեւավորվում է գինը։
