Ці атрымае Украіна знішчальнікі? Рэспубліка Малдова: урад сыйшоў у адстаўку. Выбары на Кіпры: прэзідэнтам стаў экс-кіраўнік МЗС. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Лукашэнка 13 лютага на сустрэчы з генеральным сакратаром Арганізацыі Дагавора аб калектыўнай бяспецы (АДКБ) Імангалі Тасмагамбетавым заклікаў да большага адзінства ў АДКБ», – перадае армянскае выданне Armenpress.
«Лукашэнка падкрэсліў, што ўсе члены АДКБ павінны аб’ядноўвацца і дзейнічаць разам: «Калі нехта думае, што канфлікт паміж Украінай і Расеяй — гэта не наш канфлікт, што мы дзесьці бу дзем сядзець ціха — нічога падобнага, гэтага не будзе. Прыйдзе час (не за гарамі, літаральна заўтра), і ён запатрабуе ад нас вызначыцца, заняць пэўную пазіцыю. Лукашэнка падкрэсліў, што ніхто не падштурхоўвае дзяржавы да дзеянняў, якія супярэчаць іх нацыянальным інтарэсам. «Аднак трэба шукаць кампрамісы. У рамках АДКБ мы іх даўно знайшлі, і мы дзейнічаем як адна арганізацыя». Важным ёсць той факт, што генеральны сакратар АДКБ павінен быў прадставіць Лукашэнку дзяржавы план мерапрыемстваў па рэалізацыі рашэнняў лістападаўскай сесіі Калектыву АДКБ. Усё гэта робіцца для вызначэння прыярытэтных напрамкаў дзейнасці АДКБ у перыяд старшынства Беларусі ў гэтай арганізацыі», – падкрэслівае армянскае выданне.
Пасля сустрэч у Лондане і Парыжы ў мінулы чацвер прэзідэнт Украіны Уладзімір Зяленскі выступіў перад Еўрапарламентам у Бруселі. Ён казаў аб тым, што для абароны дэмакратыі як ва Украіне, так і ва ўсёй Еўропе Украіне неабходны далейшыя пастаўкі ўзбраенняў, і перш за ўсё заходніх знішчальнікаў. Еўрапейская прэса падзялілася ў меркаваннях. У час візіту Уладзіміра Зялонскага ў Парыж у мінулую сераду Эманюэль Макрон падкрэсліў, што Расея не павінна перамагчы. Французская газета Le Monde заклікае зрабіць усё для таго, каб так яно і было.
«Калі ў слоў ёсць сэнс, то ў дадзеным выпадку ён вельмі важны. Не даць Расеі «перамагчы» азначае большую фінансавую і ваенную дапамогу, чым аказвалася Украіне да гэтага часу. Гэта таксама патрабуе пераводу ваеннай прамысловасці ў рэжым кругласутачнай працы, увядзення яшчэ больш суровых санкцый, скарачэння сродкаў, што выдзяляюцца па іншых артыкулах бюджэту, а таксама ўстойлівасці і салідарнасці грамадства. Як Макрон заявіў 19 жніўня 2022 года, гэта азначае тое, што «за свабоду трэба заплаціць сваю цану». Што ж, надышоў момант прывесці грамадскі дыскурс у адпаведнасць з патрабаваннямі рэальнасці, і падрыхтаваць грамадства да ўсведамлення ўсёй сур’ёзнасці становішча», – закліке французскае выданне.
У Малдове падало ў адстаўку ўрад пад кіраўніцтвам Наталлі Гаўрыліцы. Прэзідэнт Мая Санду прызначыла новым прэм’ер-міністрам Дарына Рэчана, які раней займаў пасаду дарадцы прэзідэнта па пытаннях абароны і нацыянальнай бяспекі. Урад ужо былой прэм’ер-міністра, арыентаваны на збліжэнне з Еўразвязам, на працягу многіх месяцаў крытыкаваўся ў сувязі з рэзкім ростам цэн на энергію і прадукты харчавання ў краіне. Якую ролю ва ўсім гэтым адыгралі прарасейскія сілы? Румынскі партал Contributors піша пра тое, што Расея спрабуе аслабіць Малдову рукамі алігархаў, якія ўцяклі з краіны з прычыны распачатага супраць іх расследавання.
«Расея падрывае еўрапейскі курс Кішынёва і спрабуе дэстабілізаваць краіну ў разгар эканамічнага крызісу: цягам усяго 2022 года ніхто нават не спрабаваў гэтага хаваць, ажыццяўляліся маніпуляцыі, на вуліцы выходзілі праплачаныя пратэстоўцы. Усё гэта сур’ёзна аслабіла ўрад пад кіраўніцтвам Гаўрыліцы, і прывяло да таго, што Кішынёў абвясціў аб неабходнасці зменаў. У авангардзе падрыўной дзейнасці і незаконнага фінансавання палітыкаў з-за мяжы знаходзяцца тры збеглыя алігархі Улад Плахотнюк, Ілан Шор і Вячаслаў Платон, ва ўсіх у іх – складаныя адносіны адзін з адным, а таксама больш-менш цесныя сувязі з расейскімі спецслужбамі», – падкрэслівае румынскае выданне.
Па выніках другога тура прэзідэнцкіх выбараў на Кіпры, які адбыўся ў нядзелю, новым кіраўніком краіны абраны былы міністр замежных спраў краіны Нікас Хрыстадулідзіс, які не ўваходзіць ні ў якую палітычную партыю. Ён набраў 51,9 працэнта галасоў, апярэдзіўшы свайго саперніка – Андрэаса Маўраяніса ад левай Прагрэсіўнай партыі працоўнага народа Кіпра, які атрымаў 48,1 адсоткі. Новы прэзідэнт узначаліць урад, у якім упершыню не будуць прадстаўлены дзве найбуйныя партыі краіны: Дэмакратычнае аб’яднанне (правыя цэнтрысты) і Прагрэсіўная партыя працоўнага народа Кіпра. Нацыянальная прэса аналізуе сітуацыю. «Хрыстадулідэсу давядзецца няпроста», – такое меркаванне выказвае кіпрскае выданне газеты Kathimerini.
«Упершыню прэзідэнт становіцца апанентам абедзвюх асноўных партыяў. Аднак тут узнікае пытанне, якім чынам ён мае намер кіраваць краінай разам з разрозненымі цэнтрыстамі, якія перасварыліся паміж сабой. Яму трэба будзе знайсці тонкі баланс для таго, каб быць дзеяздольным кіраўніком краіны, а самым першым выклікам стане фармаванне ў рада. Адразу пасля абрання перад прэзідэнтам паўстане цэлы шэраг няпростых задач, як тое: пераканаць міжнародных актараў у сваёй волі вырашыць кіпрскі канфлікт, пераадолець цяжкасці ў эканоміцы, звязаныя з высокімі коштамі і, безумоўна, даказаць тое, што ён гатовы спыніць карупцыю на карані», – адзначае кіпрскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
Artykuł Агляд прэсы: цана свабоды pochodzi z serwisu БЕЛАРУСКАЕ РАДЫЁ РАЦЫЯ.