„საქართველოს ხელისუფლების წარმომადგენლებმა – ვერ გაიგეს, ვერ დაიჯერეს და ბოლომდე ვერ გააცნობიერეს, რომ რუსეთი პოლიტიკურად და სამხედრო თვალსაზრისით მკვდარი და დამარცხებულია“, – ამის შესახებ „პალიტრას“ ეთერში თავდაცვის ექსმინისტრმა და არასამთავრობო ორგანიზაცია „სამოქალაქო იდეის“ თავმჯდომარემ თინა ხიდაშელმა განაცხადა.
ხიდაშელის განცხადებით, რუსეთი პოლიტიკურად და სამხედრო თვალსაზრისით მკვდარი და დამარცხებულია.
მისი თქმით, ომის პირველ თვეებში იყო დიდი ალბათობა იმისა, რომ რუსეთის მხრიდან საქართველოზეც მომხდარიყო თავდასხმა.
არასამთავრობო ორგანიზაცია „სამოქალაქო იდეის“ თავმჯდომარემ აღნიშნა, რომ ტრაგედიაა, თუ ხელისუფლებაში ვინმე ფიქრობს, რომ რუსეთი იმ მდგომარეობაშია, სადღაც „მეორე ფრონტს“ გახსნის.
თავდაცვის ექსმინისტრმა უკრაინის საქმეთა დროებითი რწმუნებულის კასიანოვის განცხადებაზეც ისაუბრა [კასიანოვმა უკრაინამ საქართველოს 2008 წლის ომის დროს გადაცემული „ბუკის“ სისტემების დაბრუნება სთხოვა] და აღნიშნა, რომ ეს გასაკვირი არ იყო, რადგან უკრაინა სამხედრო დახმარებას ითხოვს ყველა მისი მეგობარი, პარტნიორი სახელმწიფოსგან.
„თავიდან თხოვნა იყო, იმის გათვალისწინებით, რომ უკრაინა სამხედრო დახმარებას ითხოვს ყველა მისი მეგობარი, პარტნიორი სახელმწიფოსგან. ბუნებრივია, ამ ჩამონათვალიდან საქართველო ვერ ამოვარდებოდა და იმედია, არც არასოდეს არ ამოვარდება და მეგობარ და პარტნიორ სახელმწიფოდ დარჩება.
ერთი მოცემულობაა, როდესაც საქართველო ამბობს, მას თავად აქვს ტერიტორიული პრობლემები, მას თვითონ აქვს რუსეთის მხრიდან ნებისმიერ მომენტში აგრესიის განხორციელების ალბათობა, ამიტომ საქართველოსგან დღეს რაიმე ტიპის შეიარაღების თხოვნა ალოგიკური და არასწორია იმიტომ, რომ ჩვენ გვჭირდება დამატებით მოწოდება – ეს პოზიცია რომ ჰქონდეს საქართველოს ხელისუფლებას, გასაგები იქნებოდა მათი განცხადებები. ერთი წელი გავიდა ომის დაწყებიდან და ერთი ნაბიჯი არ გადაუდგამს საქართველოს ხელისუფლებას ამ მიმართულებით, რომ ეთხოვათ ჩვენი პარტნიორებისთვის იარაღი და ეთქვათ, ჩვენც რისკის ქვეშ ვართ.
ამერიკა აწვდის უკრაინას იარაღს. იყო პერიოდი, როდესაც საქართველო ისრაელის შემდეგ იყო ყველაზე მაღალი დახმარების მიმღები აშშ-ისგან.