Коммунистик партия қурултойида Хитойнинг собиқ етакчиси Ху Цзинтаодан Пекиндаги Халқ мажлислари залида саҳнани тарк этиш сўралгани тасвирлари бутун дунё эътиборини қозонмоқда, чунки одамлар нима бўлганини тушунишга ҳаракат қилмоқда. Ижтимоий тармоқларда тарқатилган видеода Хитойнинг амалдаги раҳбари Си Цзинпин ёнида ўтирган 79 ёшли Ху Цзинтаога ниқобли ходим яқинлашиб, унга нимадир дейди ва қўлидан ушлаб, уни кўтармоқчи бўлади. Қисқа вақтдан сўнг Ху Цзинтао ўрнидан туриб, Си Цзинпинга нимадир дейди ва йиғилиш тугашини кутмасдан, икки ходим билан бирга президиумни тарк этади. Хитойнинг Синхуа ахборот агентлиги твиттер ижтимоий тармоғида берган хабарида “Хитой Коммунистик партиясининг 20-съездининг ёпилиш маросимида собиқ ХХР раиси Ху Цзинтао соғлиғи ёмонлашгани сабабли президиумни тарк этди”, деган жумлаларни ёзган. Шанба куни олинган узунроқ кадрда Си Цзинпин партиянинг собиқ раисига ўгирилгани, жаноб Хунинг чап томонида ўтирган амалдорлар Ли Чжаншу ва Ванг Хуниннинг хавотирга тушганини кўриш мумкин. Бир пайт жаноб Ли ҳатто унга ёрдам бермоқчи бўлган, лекин жаноб Ванг «бунга аралашманг» дегандек уни қайтарди. Унинг кетишининг иккита энг катта сабаби — Хитой ҳокимият сиёсатининг бир қисми бўлган, олдинги даврни ифодаловчи етакчининг рамзий равишда четлатилишининг халққа намойиш этилиши ёки ҳақиқатан Ху Цзинтаонинг соғлиғида жиддий муаммолар борлигидир. Коммунистик партиянинг оммавий йиғилишлари, одатда, эҳтиёткорлик билан режалаштирилган тадбирлар бўлиб, Ху Цзинтаонинг кетиши тасодифий бўлмаган бўлиши мумкин деган тахминларга олиб келади. Бу воқеа бир ҳафта давом этган Коммунистик партия қурултойи якунида бўлиб ўтди ва Си Цзинпиннинг Мао Цзедундан кейинги Хитойнинг энг қудратли раҳбари сифатидаги мавқеини мустаҳкамлади. Шанба куни Пекинда Хитой Коммунистик партиясининг 20-съезди ўз ишини якунлади. 2003 йилдан 2013 йилгача бўлган Ху Цзинтаонинг ҳукмронлик йиллари ташқи дунёга очиқлик ва янги ғояларга бағрикенглик кучайган давр сифатида кўрилади. 2008 йилда Пекинда бўлиб ўтган Олимпия ўйинлари халқаро шуҳрат чўққисига айланди. Бу ерда хорижий компаниялар ташкил этилди, сайёҳлар бу ерга оқиб келди, интернет эркинлашди, маҳаллий ОАВ муносиб журналистика олиб боришни бошлади, Хитойнинг жаҳон миқёсидаги обрў-эътибори муттасил юксалди. Баъзилар Ху Цзинтаонинг даврини «беҳуда ўтган» деб атасада, иқтисодий ўсиш доимий равишда икки хонали рақамда бўлди ва Пекин халқаро ҳамжамиятда ўз обрўси ҳақида қайғурди. Хитой халқига мурожаатда партия низомига киритилган «кураш» натижасида эришилган ютуқлар ҳақида сўз юритилган қўшимчаларни кўриш мумкин. Бу Мао Цзедун ҳукмронлигини эслатади. Бош котиб сифатида жаноб Си бошиданоқ коррупцияга қарши кураш орқали барча рақибларни йўқ қилди. Энди у бу йилги съезддан иқтисодий, ижтимоий ва сиёсий жиҳатдан турли йўллар бўлиши керак, деб ҳисоблайдиганларнинг сўнгги қолдиқларидан халос бўлиш учун фойдаланди. Ху Цзинтао бу съездда кўрган охирги нарсалардан бири 205 аъзодан иборат янги Марказий Қўмитанинг таркиби эди. Унга собиқ маъмурият ғоялари билан боғлиқ, иқтисодий либерал деб ҳисобланган Ли Кецян ва Ван Ян киритилмаган.
