ایران کې د لاریونونو دوام؛ کارګران هم له اعتراض کوونکو سره یوځای شوي
د حجاب له قانون څخه د سرغړونې په تور د ۲۲ کلنې مهسا امیني نیول او بیا د سپټمبر په ۱۶مه د هغې مړینه د دې سبب شوې ده چې په ایران کې د اسلامي جمهوري نظام پر ضد د وروستیو کلونو تر ټولو پراخو اعتراضونو ته لمن ووهي.
د فرانس پریس اژانس د راپور له مخې پرون د ایران په یو شمېر ښارونو کې د دې سربېره چې امنیتي ځواکونه دا لاریونونه سخت ځپي، مظاهرې روانې وې.
د بشري حقونو د ډلو په وینا د دې مظاهرو په ترڅ کې لږ تر لږه تر اوسه ۱۲۲ کسانو خپل ژوند له لاسه ورکړی دی.
د دې مظاهرو مشري نجونې او مېرمنې کوي، دوی خپل ټکري لرې کوي، د اسلامي دولت پر ضد شعارونه ورکوي او له امنیتي ځواکونو سره مقابله کوي.
ایراني فعالانو پرون خلکو ته د نورو لاریونونو بلنه ورکړه، خو د دې لپاره چې انټرنېټ په ځینو ځایونو کې نه شته یا کمزوری دی دا نه معلومېږي چې په پرونیو مظاهرو کې د خلکو شمېر څومره وو.
اسوشیتدپریس اژانس د عیني شاهدانو په وینا ویلي دي چې د سختو امنیتي تدابیرو سربېره پرون د تهران په څو پوهنتونونو کې هم د رژیم پرضد مظاهرې پیل شوې.
فرانس پریس اژانس د خواله رسنیو د تصویرونو په استناد څرګندوي چې په لسګونو کارګران په تبریز کې د شیرني جوړولو د فابریکې مخې ته په اعتراض راغونډ شوي دي.
دې اژانس د دې ویډیوګانو تایید نه دی ترلاسه کړی.
د زاهدان په ښار کې پرون د مغازو شیشې ماتې شوې وې، پلې لارې له شیشو ډکې وې او د راپورونو له مخې د ایران امنیتي ځواکونو په دې ښار کې له مظاهره چیانو سره له تشدده کار اخیستی دی.
د ایران د کورنیو چارو د وزارت د امنیتي چارو مرستیال میراحمدي د ایران ایرنا دولتي اژانس ته وویل چې په زاهدان کې ناامنۍ کمې شوې دي.
په دې ترڅ کې ایراني چارواکو د امریکا متحدایالتونه تورن کړي دي چې له اعتراضونو څخه د استفادې په لټه کې دي څو د ۲۰۱۵ کال د اټومي تړون د بیا راژوندي کېدو د خبرو په لړ کې امتیازات ترلاسه کړي.
د ایران د قضایي قویې مرستیال کاظم غریب ابادي پرون وویل، ایران به د امریکا د متحد ایالتونو او په لندن کې د مېشتو فارسي ژبو رسنیو پر ضد چې له ادعا سره سم په ایران کې ناامنیو ته لمن وهي، د تهران په محکمه کې عارض شي.