ნატოს გენერალურმა მდივანმა იენს სტოლტენბერგმა 12 ოქტომბერს განაცხადა, რომ დასავლეთის ქვეყნები განიხილავენ უკრაინისთვის მეტი საჰაერო თავდაცვის სისტემების მიწოდების გზებს რუსეთის „განურჩეველი“ სარაკეტო იერიშებისგან ქვეყნის დასაცავად.
ზედიზედ ორი დღის განმავლობაში რუსეთმა სარაკეტო დარტყმების რამდენიმე ტალღა განახორციელა უკრაინის რამდენიმე რეგიონში. დაიბომბა მრავალი ქალაქი, მათ შორის კიევი. ეს პასუხია გასული კვირის ბოლოს ყირიმის ხიდის აფეთქებაზე.
„ჩვენ განვიხილავთ, როგორ გავზარდოთ უკრაინის მხარდაჭერა, მთავარი პრიორიტეტი იქნება უკრაინის საჰაერო თავდაცვის სისტემის გაძლიერება“, - თქვა სტოლტენბერგმა ბრიუსელში ნატოს თავდაცვის მინისტრების შეხვედრის წინ.
ნატოს შეხვედრის პარალელურად ბრიუსელში იმართება 50-ზე მეტი ქვეყნის წარმომადგენელთა შეხვედრები.
უკრაინის პრეზიდენტმა ვოლოდიმირ ზელენსკიმ 11 ოქტომბერს „დიდი შვიდეულის“ ლიდერებს სთხოვა მეტი საჰაერო თავდაცვის შესაძლებლობები, რათა გაანეიტრალონ რუსეთის საჰაერო იერიშები. მისი თქმით, როცა უკრაინა ასეთ სისტემებს მიიღებს, „რუსეთის ტერორის საკვანძო ელემენტი - სარაკეტო დარტყმები - აღარ იმოქმედებს.“