Langrennsløpar Heidi Weng blir ikkje med når resten av landslagstroppen reiser på eit nytt høgdeopphald i italienske Livigno seinare i oktober.
– Eg må trene godt heime og ikkje i høgda denne gangen. Eg trur det kan skje meir «gærne» ting om eg drar. Eg trur det er lurast å vere heime, seier Weng til VG under ei samling i Oslo.
Ho deltok på den førre høgdesamlinga i Livigno i september.
– Eg ligg kanskje et lite stykke bak, men eg har mest fokus på at sesongen er lang. Eg skal prøve å ha senka skuldrar i november og desember. Det er januar som er hovudfokuset mitt med tanke på korleis det har vore til no, sa Weng til NTB for ei månad sidan.
Etter at OL gjekk i vasken på grunn av korona, sklei ho på isen og slo hovudet. Hjernerystelsen sette henne mykje tilbake.
