Ղրիմի կամուրջը պայթեցնելու գործով ռուս իրավապահները կալանավորել են 8 մարդու, նրանց թվում Հայաստանի մեկ քաղաքացու՝ 1985 թվականին ծնված Արթուր Տերչանյանին, առավոտյան հաղորդեց Ռուսաստանի Անվտանգության դաշնային ծառայությունը։
Մոսկվան, որն ահաբեկչություն է համարել կամուրջի պայթյունը, Ռուսաստանի հինգ, Ուկրաինայի երկու և Հայաստանի քաղաքացուն մեղադրում է այդ հանցագործությունը նախապատրաստելու համար։ Հայաստանի ընտրողների պետական ռեգիստրում Արթուր Տերչանյան անուն-ազգանունով քաղաքացի չկա։
Ըստ Ռուսաստանի Անվտանգության դաշնային ծառայության, պայթյունի կազմակերպիչը Ուկրաինայի ռազմական հետախուզության ղեկավար Կիրիլ Բուդանովն է։ Պայթուցիկները Օդեսայից տեղափոխել են Բուլղարիայի, Վրաստանի և Հայաստանի տարածքով։
Ընդհանուր առմամբ, այժմ բացահայտվել է նախապատրաստման առնվազն 12 մասնակից, հաղորդում են ռուս իրավապահները։ Հայաստանի գլխավոր դատախազությունը, որն այս օրերին տեղեկություն չէր տրամադրում պայթյունին առնչվող հարցերով, այսօր ռուս իրավապահների հաղորդագրությունից քիչ անց հայտարարեց, թե Ազգային անվտանգության ծառայությանը ցուցում է տվել քրեական վարույթ նախաձեռնել։
Գլխավոր դատախազի խորհրդական Լուսինե Մարտիրոսյան. - «Օրենքով նախատեսված գործիքակազմի, այդ թվում՝ միջազգային փոխօգնության ինստիտուտի կիրառման, դատախազությունը հետևողական է լինելու հրապարակել տեղեկատվության հանգամանքները ամբողջությամբ բացահայտելու ուղղությամբ։ Արդյունքների մասին ավելի ուշ կտրամադրենք լրացուցիչ տեղեկություն»։
Կամրջով դեպի բռնակցված Ղրիմ ընթացող բեռնատարը պայթել էր հոկտեմբերի 8-ի առավոտյան, ինչի հետևանքով երեք մարդ էր զոհվել։ Ռուսաստանի նախագահ Պուտինը կատարվածն ահաբեկչություն է որակել և մեղադրել Կիևին, որը, սակայն, չի ստանձնել հարձակման պատասխանատվությունը։
Մինչ Հայաստանի ԱԱԾ-ն կսկսի քննություն պարզել, թե ով է Արթուր Տերչանյանը և ինչպես է ներգրավվել Ռուսաստանի Անվտանգության դաշնային ռազմական հետախուզության մատնանշած հանցագործության մեջ, ռուս իրավապահներն արդեն որոշ մանրամասներ են հաղորդում։ Ըստ այդմ, բեռնատարում պայթուցիկը քողարկվել է շինարարական պոլիէթիլենային թաղանթով և օգոստոսի սկզբին Օդեսայի նավահանգստից ուղարկվել բուլղարական Ռուսե նավահանգիստ, ապա վրացական Փոթի նավահանգիստ, հետո արդեն՝ Հայաստան: Եվ օրեր առաջ՝ սեպտեմբերի 29-ից հոկտեմբերի 3-ը Երևանում բեռը մաքսազերծվել է «տրանսալյանս» տերմինալում ԵվրԱզԷՍ-ի կանոններով։ Այստեղ արդեն փաստաթղթերը կեղծվել ու փոփոխվել են, որից հետո բեռն ուղարկողը դարձել է «ԳՈՒ ԱՐ Ջի ԳՐՈՒՊ» ընկերությունը, իսկ ստացողը՝ Մոսկվայում գրանցված «Լիդեր» ընկերությունը։ Եվ արդեն հոկտեմբերի 4-ին Վրաստանում գրանցված DAF բեռնատարով բեռները հատել են ռուս-վրացական սահմանը Վերին Լարսի անցակետով, իսկ հոկտեմբերի 6-ին առաքվել և բեռնաթափվել Կրասնոդարի երկրամասում գտնվող Արմավիրի մեծածախ պահեստում։
Ռուսական կողմի մատնանշած «ԳՈՒ ԱՐ Ջի ԳՐՈՒՊ» ընկերությունը գրանցված է Ալավերդի քաղաքում և գործում է փաստաթղթերում ներկայացված նույն հասցեում՝ բնակելի շենքում։ Պետռեգիստրի տվյաներով, ընկերության 100 տոկոսի բաժնետերը 41-ամյա Գուրգեն Շլեպչյանն է, որը Հայաստանի քաղաքացի է և ընտրողների ռեգիստրի տվյլաներով, այդ նույն հասցեում էլ հաշվառված է։
«Ազատությունն» այսօր եղել է այդ հասցեում, որտեղ պարզվեց վարձով մի ռուս տղամարդ է ապրում։ Ներկայանալ չցանկացող տղամարդը մեր թղթակցին միայն հայտնել է, որ տանտերերը ներքևի հարկում են բնակվում։ Իսկ ահա տանտերը մի կին էր, որը պատմեց՝ «ԳՈՒ ԱՐ Ջի ԳՐՈՒՊ»-ի սեփականատեր Գուրգեն Շլեպչյանն է իր եղբայրն է, ում հաշվառել է իր բնակարանում թե ինչու՝ չմանրամասնեց։ Ասաց միայն, որ եղբայրը բնակվում է վրացական՝ հիմնականում հայերով բնակեցված Շահումյան քաղաքում, զբաղվում է առևտրով, այլ մանրամասներ հրաժարվեց փոխանցել։
Հայտնի չէ, թե ինչ կա կապ ունի կալանավորված Արթուր Տերչանյանը Գուրգեն Շլեպչյանի հետ։ Պետական ռեգիստրում նշված չէ, թե ինչ գործունեությամբ է զբաղվում «ԳՈՒ ԱՐ Ջի ԳՐՈՒՊ»-ը։
