ՌԴ նախագահ Վլադիմիր Պուտինը հայտարարել է, որ «Հյուսիսային հոսք» գազատարով տարանցման կորցրած ծավալը կարելի է վերաուղղել դեպի Սև ծովի տարածաշրջան։ Դրա համար, ըստ նրա, հնարավոր է Թուրքիայում ստեղծել ամենամեծ գազային հանգույցը, որով կիրականացվեն մատակարարումները դեպի Եվրոպա։
Պուտինը պարզաբանել է, որ դրա համար եվրոպացի գործընկերները պետք է հետաքրքրություն ցուցաբերեն, գրում է kommersant.ru-ն։
Ռուսական էներգետիկ շաբաթվա ֆորումի լիագումար նիստում իր ելույթի ժամանակ Պուտինն ասել է, որ գազային հանգույցի ստեղծումը «տնտեսապես հնարավոր է», և դրա անվտանգության մակարդակը կլինի ավելի բարձր։
««Հյուսիսային հոսք»-երի միջով Բալթիկ ծովի հատակով տարանցման կորցրած ծավալը կարող ենք նաև տեղափոխել դեպի Սև ծովի տարածաշրջան և այդպիսով դարձնել մեր վառելիքի, բնական գազի Եվրոպա մատակարարման հիմնական ուղիները Թուրքիայի տարածքով՝ Թուրքիայում ստեղծելով Եվրոպայի ամենամեծ գազային հանգույցը»,- ասել է նա։
Պուտինը հիշեցրել է, որ Ռուսաստանը Թուրքիային գազ է մատակարարում «Թուրքական հոսք» և «Երկնագույն հոսք» գազատարներով։ Առաջիկայում նախատեսվում է նաև սկսել «Սիբիր հզորություն 2» և Մոնղոլիայում դրա շարունակության՝ «Սոյուզ-Վոստոկ» գազատարների շինարարությունը։
Ռուսական գազի մատակարարումները Եվրամիություն (ԵՄ) կրճատվել են «Հյուսիսային հոսք»-ի և «Հյուսիսային հոսք 2»-ի վթարներից հետո. սեպտեմբերի 26-ին այնտեղ ճնշումը կտրուկ նվազել է։ Պարզվել է, որ պատճառը պայթյուններն են։ Թե կոնկրետ ով է իրականացրել դրանք, չի պարզվել։ Մոսկվան տեղի ունեցածը համարում է ահաբեկչություն։ Պուտինը պնդում է, որ ահաբեկչությունն իրականացվել է Եվրոպայի հետ Ռուսաստանի կապերը խզելու համար: Այժմ Ռուսաստանի Դաշնությունը ԵՄ-ին գազ է մատակարարում միայն Ուկրաինայի տարածքով՝ օրական մոտ 42 մլն խմ ծավալով, ինչպես նաև «Թուրքական հոսքի» մեկ գծով (օրական մոտ 45 մլն խմ):
