„საერთაშორისო გამჭვირვალობა - საქართველოს“ აღმასრულებელი დირექტორი ეკა გიგაური გააკრიტიკა „ქართული ოცნების“ თავმჯდომარემ ირაკლი კობახიძემ.
„გიგაურს რაც შეეხება, ეს არის ის ადამიანი, რომელმაც განაცხადა შემდეგი: რუსეთი ყველგან ვერ იომებს და ჩვენ უნდა გამოვიყენოთ შესაძლებლობის ფანჯარა. ეს იყო გიგაური და ასეთ დროს თითის გაშვერა სხვებისკენ არის უბრალოდ წარმოუდგენელი. პირდაპირი მოწოდება ჰქონდა მას ომისკენ. რას ემსახურება ეს ადამიანი ყველა ძალიან კარგად ხედავს. აქედან გამომდინარე, მნიშვნელოვანია, ყველა გაემიჯნოს გიგაურის ნებისმიერ განცხადებას“, - თქვა კობახიძემ.
ირაკლი კობახიძე კოლეგებთან (მამუკა მდინარაძესთან და დიმიტრი სამხარაძესთან) ერთად ზუგდიდის მოსწავლე-ახალგზრდობის სასახლეში პარტიის სამეგრელო-ზემო სვანეთის ადგილობრივი ორგანიზაციების ლიდერებს, მუნიციპალიტეტების მერებს და საკრებულოს თავმჯდომარეებს შეხვდა. ამის შემდეგ კობახიძემ მედიის შეკითხვებს უპასუხა.
რაც შეეხება ეკა გიგაურის განცხადებას, მის მიერ 23 მარტს გაკეთებული კომენტარი იძებნება საინფორმაციო სააგენტო ინტერპრესნიუსის და საზოგადოებრივი მაუწყებლის პირველი არხის ვებსაიტებზე.
ამ კომენტარში ეკა გიგაური უკრაინაში რუსეთის მიერ წარმოებული ომის ფონზე საქართველოსთვის ევროატლანტიკური ინტეგრაციის ახალ შესაძლებლობებზე საუბრობს:
"ინტერპრესნიუსი":
„საქართველოს შეიძლება ჰქონდეს უპრეცედენტო მხარდაჭერა დასავლეთის მხრიდან, ვინაიდან დასავლეთი ყოველთვის განგვიხილავდა პარტნიორებად და დღეს ეს ყველაფერი უნდა დავამტკიცოთ. საფრთხეები, რა თქმა უნდა, არსებობს, მაგრამ ეს არ არის ის საფრთხეები, რომლებზეც დღეს საუბრობს სახელმწიფო, მთავარი საფრთხეა, რომ შეიძლება შესაძლებლობების ფანჯარა ვერ გამოვიყენოთ. არასწორ დისკუსიებს ვატარებთ, არასწორ გადაწყვეტილებებს ვიღებთ, ვართ დაყოფილები, მთავრობა არ ელაპარაკება ხალხს და არ ფიქრობს რა ნაბიჯები უნდა გადაიდგას.
უკრაინაში რუსეთი აგებს ომს და არის ერთობა დასავლეთის განვითარებულ სახელმწიფოებში, რომ გააკეთონ ყველაფერი, რათა პუტინის რეჟიმი განადგურდეს. როდესაც ასეთი რამ ხდება, ჩნდება ახალი შესაძლებლობები საქართველოსთვის, მათ შორის ევროპასთან და ნატო-ში ინტეგრაციის კუთხით. ძალიან მნიშვნელოვანია ასეთ დროს სწორი ნაბიჯები გადავდგათ, ჩვენი მთავრობა და ხალხი უნდა იდგეს დასავლეთის გვერდით, ამასთან დაკავშირებით კითხვის ნიშნები არ უნდა გაჩნდეს, აუცილებლად უნდა დავგეგმოთ რას ვაკეთებთ იმისთვის, რომ ევროკავშირში ინტეგრაცია სწრაფად მოხდეს. ასევე ძალიან მნიშვნელოვანია საზოგადოებამ იცოდეს, რა საფრთხეების წინაშე დგას ქვეყანა და რას აკეთებს სახელმწიფო იმისთვის, რომ ამ საფრთხეებს პასუხი გავცეთ. ამისთვის მნიშვნელოვანია გაფართოებული უსაფრთხოების საბჭოს სხდომა, სადაც დამსწრე იქნება როგორც ოპოზიციური პარტიები, ასევე პრეზიდენტი და მმართველი პარტია“, - აღნიშნა ეკა გიგაურმა.
იდენტური შინაარსითა და კონტექსტით არის გიგაურის განცხადება გამოქვეყნებული "პირველი არხის" ვებსაიტზე.
"დაშინება და შეშინება ადამიანების არის არასწორი, ეს საფრთხე დღეს არ დგას, რადგან რუსეთი ომს აგებს უკრაინაში და შესაბამისად, იქ არ ყოფნის რესურსები, ამიტომ ის ვერ დაიწყებს ყველა მიმართულებით საომარ მოქმედებებს. საუბარი არის იმაზე, რომ ჩვენ დღეს სწორი მიმართულებით უნდა წავიყვანოთ დისკუსია და ყველაფერი გავაკეთოთ, რათა ეს შესაძლებლობის ფანჯარა გამოვიყენოთ, ასევე ყველანაირად ვაჩვენოთ დასავლეთს, რომ მათ გვერდით ვართ".
"საერთაშორისო გამჭვირვალობა-საქართველოს" ხელმძღვანელმა 15 ივნისს რადიო თავისუფლებას უთხრა, რომ "არც ეკა გიგაური და არც დასავლეთი საქართველოს ომში ჩართვას არ ითხოვს".
დღეს, 3 აგვისტოს, „საერთაშორისო გამჭვირვალობა საქართველომ” (TI) 3 აგვისტოს გამოაქვეყნა გამოკვლევა, რომლის თანახმად, მხოლოდ მარტში, აპრილში, მაისსა და ივნისში რუსეთის მოქალაქეებმა საქართველოში დაარეგისტრირეს 6419 კომპანია. ორგანიზაციის ცნობით, ეს 7-ჯერ მეტია, ვიდრე მთლიანად 2021 წელს და თითქმის იმდენივე, რამდენიც უკანასკნელი 9 წლის განმავლობაში.
გამოკვლევას გამოეხმაურა პარლამენტის თავმჯდომარე შალვა პაპუაშვილი. „სამწუხაროდ ესეც ნაწილია იმ კამპანიის, რომელიც ცდილობს წარმოსახოს თითქოს არის გარკვეული მიმდინარე ტრენდი, რომ საქართველო რუსეთზეა დამოკიდებული და დასავლეთს სცდება. ამ კამპანიას აწარმოებენ, თითქოს არის ანტიდასავლური ტრენდი, მერე ამის საპირისპიროდ თვითონვე აწარმოებენ კამპანიას, რომ დასავლეთი კარგია. თვითონვე ქმნიან ყალბ აღქმებს და მერე თავადვე ებრძვიან ამ ყალბ აღქმებს", - თქვა პაპუაშვილმა.
