مسئولان شرکت برشنا تحت مدیریت حکومت طالبان به روز چهارشبنه در یک نشست خبری در کابل اعلام کردند که حدود نیم پول بدهی برق تاجیکستان را پرداخت کرده اند.
اسدالله انعام، رئیس مالی و اداری این شرکت می‌گوید، ۷۹ میلیون دالر به تاجیکستان از درک پول برق وارداتی بدهکار بودند که از این میان تا به حال ۳۹ میلیون آن را پرداخت کرده اند.
به گفتۀ آقای انعام، ۶ میلیون دالر دیگر از بدهی‌های تاجیکستان را در همین روزها پرداخت خواهند کرد: "ما از تاجیکستان از اول جولای تا به حال به ارزش ۷۹ میلیون دالر برق وارد کردیم. از این میان ۳۹ میلیون دالر قرض را پرداخت کردیم و ۳۹ میلیون دالر دیگر مانده است."
اما محمد عمر آسوزاده، رئیس شرکت برق تاجیکستان به تازگی در یک نشست خبری گفته است که شرکت برشنای افغانستان از تاجیکستان ۲۸ میلیون دالر قرضدار است.
آقای آسو زاده در ادامه افزوده که شرکت برشنا ماه گذشته دو میلیون دالر را به حساب شرکت برق تاجیکستان منتقل کرده است.
اسدالله انعام در این نشست خبری توضیح نداد که تفاووت ۱۲ میلیون دالر در گفته‌های او و رئیس شرکت برق تاجیکستان از کجا برخاسته است.
اسدالله انعام، رئیس مالی و اداری شرکت برشنا می‌گوید که این شرکت در مجموع ۱۵۱ میلیون دالر پول برق وارداتی کشورهای همسایه و شرکت‌های داخلی را پرداخت کرده است و حدود ۱۲۲ میلیون دالر دیگر بدهکار است.
آقای انعام همچنان می‌افزاید که این شرکت توانایی پرداخت تمام قرض‌هایش را دارد، اما به دلیل موجودیت مشکلات بانکی، شرکت برشنا نتوانسته که تمام پول برق وارداتی تاجیکستان را به وقتش پرداخت کند.
مسئولان شرکت برشنان می‌گویند که در ۱۰ ماه گذشته ۱۴ پایۀ برق منهدم شده و یا به گونۀ قسمی تخریب شده، اما آنان این پایه‌ها را ترمیم کردند تا در برق‌رسانی‌شان به شهروندان سکتگی به میان نه آید.
این در حالیست که مردم ولایت‌های مختلف به ویژه کابل همواره از کمبود برق و پرچاوی‌های درازمدت شکایت دارند.
افغانستان بخش زیادی از برق مورد نیازش را از ازبکستان، تاجیکستان و ترکمنستان وارد می‌کند.
