Հայաստանի արտգործնախարար Արարատ Միրզոյանը ԵԱՀԿ գործող նախագահի անձնական ներկայացուցիչ Անջեյ Կասպրշիկին է ներկայացրել վերջին օրերի ընթացքում տարածաշրջանում ստեղծված անվտանգային իրավիճակը։
Ըստ հայկական արտաքին քաղական գերատեսչության, Միրզոյանը դատապարտել է եռակողմ հայտարարությունների կամայական մեկնաբանության և «իրավիճակի ապակայունացման ադրբեջանական փորձերը՝ ընդգծելով միջազգային հանրության՝ մասնավորապես ԵԱՀԿ Մինսկի խմբի համանախագահ պետությունների կողմից իրավիճակի հասցեական գնահատականների կարևորությունը»։
Հանդիպման ընթացքում վերահաստատվել է հայկական կողմի կառուցողական դիրքորոշումն՝ ուղղված Հայաստանի և Ադրբեջանի միջև հարաբերությունների կարգավորմանը, Լեռնային Ղարաբաղի հակամարտության խաղաղ հանգուցալուծմանը։
Իրավիճակն Արցախում օգոստոսի 1-ի առավոտվանից է լարվել։ Այսօր էլ Արցախի պաշտպանության բանակը հաղորդեց, որ ադրբեջանական ուժերը կիրառել են նռնականետեր և ԱԹՍ-ներ: Հաղորդվում է մեկ զոհի և վիրավորների մասին:
Այսօր ավելի վաղ էլ Բաքուն Երևանին մեղադրել է եռակողմ հայտարարության դրույթները խախտելու մեջ: Ադրբեջանի ՊՆ-ն հաղորել էր Լաչինի մերձակայքում տեղի ունեցած միջադեպի մասին, որի հետևանքով, ըստ պաշտոնական Բաքվի, ադրբեջանցի զինծառայող էր զոհվել։
