Ein person er knivstukken i magen utanfor ei adresse i Notodden sentrum. Skaden ser ut til å vere alvorleg, og politiet har kontroll på gjerningspersonen.
– Ein person hadde blod på magen. Det var også observert ein person med kniv i nærleiken av denne adressa, fortel politiet sin operasjonsleiar Eskil Hagen Olsen til NRK.
Ifølge politiet skal det ikkje vere fleire involverte. Fornærma er køyrt til sjukehus.
– Vi veit ikkje noko om kor alvorleg det er. Knivstikking i magen kan sjå veldig harmlaust ut, men det kan vere store skader innvendig. Helsevesenet behandlar nok dette som kritisk, seier operasjonsleiaren til NRK.
Politiet gjennomfører no vitneavhøyr på staden, og vil avhøyre mannen dei har pågripe etter kvart.