Украінскае незалежнае аб’яданнне „Free Belarus Center”, скіраванае на дапамогу беларусам, сёлета працягне працу па ўвядзенні санкцый супраць Беларусі.
„Мы верым, што вынік ад такіх дзеянняў будзе заўважны. Бо Украіна – адзіная краіна, чые санкцыі могуць нанесці рэальны ўдар па Беларусі”, – зазначае каардынатар асветніцкіх праграм „Free Belarus Center” Мікола Рыбытва:
– Украіна дагэтуль на сённяшні дзень застаецца адным з найбольшых эканамічных партнёраў Беларусі. Беларускія тавары праходзяць праз украінскія парты і калі гэта забараніць, Украіна не пацерпіць, але рэжым дакладна гэта адчуе. Мы заўжды ўпэўненыя, што гэта таксама на карысць Украіны. Амаль тысяча кіламетраў мяжы з краінай, якая становіцца агрэсарам, на тэрыторыі якой размяшчаюцца расейскія войскі, гэта дакладна не на карысць Украіны.
Акрамя таго, як зазначыў Мікола, аб’яднанне працягне дапамогу і прыватным асобам па юрыдычных, гуманітарных, псіхалагічных і іншых накірунках. Атрымаць падтрымку можна праз сайт freebelarus.center, а таксама праз тэлеграм-бот.
Марына Савіцкая, Беларускае Радые Рацыя
