د اکسفام موندنې ښيي چې د کرونا وبا له پيله د نړۍ د لسو تر ټولو بډایه کسانو شتمنۍ څه باندې دوه برابره شوې او ۱،۵ تریلیونه ډالرو ته رسېدلې ده.
په ورته وخت کې د وبا له پيله د نړۍ په کچه له ۱۶۰ ملیونو ډېر کسان د بې وزلۍ خواته بیول شوي دي.
اکسفام د خپلو دې موندنو راپور نن دوشنبې د جنورۍ په ۱۷مه داسې مهال خپور کړ چې همدا اوونۍ د نړۍ د اقتصادي مجمع انلاین غونډه هم د سویس په داووس کې جوړیږي.
د اکسفام موسسې په راپور کې راغلي، د همدې وبا په ترڅ کې ډېر بډایه خلک د مالي او پولي تحرکاتو او ونډو له کبله لا بډایه شوي.
دا په دې معنا چې د وبا له پيله په هرو ۲۶ ساعتونو کې یو شتمن کس میلیارډر شوی دی.
د راپور له مخې د نړۍ ۱۰ تر ټولو بډایه کسان د ۳،۱ میلیارده بې وزله کسانو په اندازه شتمني لري.
د اکسفام د راپور لیکوالانو ویلي، د اقتصاد دا چاره تصادفي نه، بلکې انتخابي ده.
د دوی په وینا " اقتصادي تاوتریخوالی" هغه وخت رامنځته کېږي چې د سیاسي جوړښتونو تګلارې یوازې د بډایه او ځواکمنو کسانو لپاره جوړیږي.
د راپور په وینا، دا وضعیت په نور ټولو بې وزله کسانو ښځو او نجونو ناوړه اغیز کوي.
راپور کې ویل شوي چې د همدې نابرابرۍ له کبله هره ورځ ۲۱ زره کسان روغتیایي خدمتونو ته د نه لاس رسي، جنسیتي تاوتریخوالي، لوږې او اقلیمي بدلون له کبله مړه کیږي.
د اکسفام په راپور کې غوښتنه شوې چې پر بډایه او میلیاردرانو باید مالیه ډېره شي چې له مخې به یې بې وزله هېوادونو کې د کرونا واکسین تشه هم تر یوه ځایه ډکه شي.
دوی ویلي، اوس مهال د دې واکسین معنوي مالکیت له بډایه هېوادونو سره دی.
د راپور له مخې د نړۍ ۱۰ تر ټولو بډایه کسان د ۳،۱ میلیارده بې وزله کسانو په اندازه شتمني لري.