Իմ հասցեին հնչել է վիրավորանք ընդդիմադիր գործիչների կողմից, որից հետո իրավիճակը սրվել է, որի արդյունքում հայտարարվել է ընդմիջում։ Այս մասին լրագրողների հետ ճեպազրույցում ասաց ԱԺ փոխխոսնակ Հակոբ Արշակյանը՝ անդրադառնալով Ազգային ժողովի նիստերի դահլիճում առաջացած լարվածությանը։
«Թշնամական մթնոլորտ ԱԺ դահլիճում չկա, կան որոշակի բանավեճեր, սրվածություն կա»,–ասաց նա։
Անդրադառնալով սահմանին տիրող լարվածությանը՝ Հակոբ Արշակյանն ասաց․ «Հայաստանում անկախությունից հետո սահմանին իրավիճակը լարված է, և կարծում եմ, որ այն խաղաղության օրակարգը, որը առաջ ենք տանում, ինչի համար ժողովրդից քվե ենք ստացել, միտված է դրան, որ ապահովվի Հայաստանի անվտանգությունը, այլևս զինվորներ չզոհվեն, և Հայաստանը պատերազմների մեջ չհայտնվի»,–ասաց նա։
Ինչ վերաբերում է հայ-թուրքական հարաբերություններին, Հակոբ Արշակյանն ասաց․ «Մեր օրակարգը չի փոխվել, առանց նախապայմանների պետք է սահմանները բացվեն և հաստատվեն դիվանագիտական հարաբերություններ։ Մենք բազմիցս ասել ենք, որ մենք միջանցքային տրամաբանություն չենք քննարկելու, այնպես ինչպես մենք ենք հասկանում»։