Սա իրականում կոնկրետ միջամտություն է սեփականության իրավունքին, պետությունը որոշում է՝ ինչպես կարող է տնօրինվել սեփականությունը․ Վարդևանյանը՝ անկանխիկ գործառնությունների օրինագծի մասին (տեսանյութ)
Այս նախագծի վերաբերյալ պետք է տեղի ունենային առավել լայն հանրային քննարկումներ։ Այս մասին ԱԺ նիստին հայտարարեց «Հայաստան» խմբակցության պատգամավոր Արամ Վարդևանյանը՝ անդրադառնալով Կառավարության կողմից ներկայացված «Անկանխիկ գործառնությունների մասին» և կից ներկայացված օրենքների նախագծերի փաթեթին։
«Եթե պարոն Երիցյանը (ԿԲ նախագահի տեղակալ Ներսես Երիցյան-Tert.am) ցանկանար անկեղծ զրուցել հասարակության հետ, ասելու էր, որ բացառապես բանկերն են։ Այս նախագիծն այն մասին է, որ բանկերն ամբողջությամբ ունենան մենաշնորհային դիրք՝ գումարի շրջանառության վերաբերյալ։ Սրանից ինչ է շահում հայ մարդը, ես նախագծի հիմնավորումներից լավ չեմ հասկանում։ Մի բան հստակ է՝ սա իրականում կոնկրետ միջամտություն է սեփականության իրավունքին, որովհետև մենք ասում ենք, որ պետությունը որոշում է, թե ինչպես կարող է և չի կարող տնօրինվել սեփականությունը։ Սա, դասական իմաստով, իրավունքից հետքայլ է։ հանուն ինչի՞»,-ասաց պատգամավորը։
Նա հարց հնչեցրեց՝ արդյո՞ք կատարվել է վերլուծություն, պատշաճ գնահատում, թե հայ հասարակությունն ինչպիսի տրամադրություն, վերաբերմունք ունի այս փոփոխության վերաբերյալ։
Հիշեցնենք՝ նախագծով առաջարկվում է կարգավորել երկրի տարածքում անհատ ձեռնարկատերերի և կազմակերպությունների կողմից 2022 թվականի հուլիսի 1-ից` 300.000 ՀՀ դրամը գերազանցող ապրանքների (գույքի) օտարման, դրանց օգտագործման, աշխատանքների կատարման և ծառայությունների մատուցման գործարքների դիմաց, աշխատավարձերի, կրթաթոշակների, կենսաթոշակների, նպաստների, փոխառությունների, ներկայացուցչական ծախuերի, գործուղման նպատակով կատարվող անկանխիկ ձևով վճարումների, ինչպես նաեւ անկանխիկ գործառնությունների հետ կապված այլ հարաբերությունները: