Нұр-Сұлтанда эпидемиологиялық жағдай коронавируспен ауырғандар саны артуына байланысты шиеленісіп бара жатыр. Қаңтардың басынан бері қалада 36 347 жағдай тіркелген. Бұл туралы елорданың санитарлық-эпидемиологиялық бақылау департаменті өкілі мәлімдеді, - деп хабарлайды Tengrinews.kz тілшісі.
"Кейінгі тәулікте 4639 жағдай тіркелді (симптомы бар - 3192, симптомсыз - 1447), өсім 2,5 пайыз болды. Кейінгі аптада 31 789 COVID-19 дерегі тіркелді. Ауырғандар саны өткен аптадан 5 есе жоғары (өткен апта - 4476), соның нәтижесінде 100 мың тұрғынға шаққанда ауруға шалдыққандардың апталық көрсеткіштері 496,0-ден 2674,9-ға дейін өсті. Ал репродуктивті саны 1,905-ке жетті", - деді ведомство өкілі.
Санитария дәрігерлерінің айтуынша, қаңтардың 16 күнінде 36 347 жағдай тіркелген, бұл 2021 жылдың желтоқсанында тіркелген 2737 жағдайдан 12 есе жоғары.
"Омикрон штамы вирустың басқа мутацияларына қарағанда тез таралады. COVID-19-бен ауырған науқастарға да, 2021 жылдың наурыз-қыркүйегінде вакцина салдырған адамдарға да жұғуы мүмкін. Қала бойынша қазір 244824 адам ревакцина алуы қажет (ақпан, наурыз, сәуір, мамыр, маусым, шілде айларында вакцина курсын алғандар), олардың 27874-і немесе 11,3 пайызы қайта вакцина салдырған", - деді санэпидбақылау департаментінің баспасөз қызметі өкілі.
Қазақстандықтарға қауіпсіздік шараларын сақтау қажет екені туралы айтылды. Сондай-ақ, департамент өкілі вакцина, ревакцина алуға шақырды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
