Фото: «РИА Новости» Афғонистоннинг Ғазни вилоятида «Толибон» ҳукуматининг мулозимлари шифокорларга эркаклар ҳамроҳлигисиз қабулига келган беморларни даволашни тақиқлади. Бу ҳақда Etilaatroz нашри хабар берди. Илгари аёллар касалхоналарга қариндошлари ҳамроҳлигида келиши мумкин эди. Бироқ «Толибон» комиссияси аёлларнинг эркаклар бошчилигисиз касалхонага боришини «ноқонуний ва ахлоқсиз» деб топди. Шифокорларга бундай беморларга ёрдам бермаслик, касалхонага ётқизмаслик талаби қўйилган. Нашрнинг Афғонистон Соғлиқни сақлаш вазирлигидаги манбаси таъкидлашича, ушбу тақиқ Исломий фазилатларни тарғиб қилиш ва иллатларни йўқотиш вазирлиги орқали Афғонистоннинг бошқа вилоятларига ҳам татбиқ этилмоқда. Декабрь ойи ўрталарида мазкур вазирлик аёлларга жамоат жойларида юзи очиқ бўлишини тақиқлаш тўғрисида қарор чиқарганди. Афғонистонлик аёлларга энди фақат тўқ рангдаги бурқа (паранжи) ёки кўз қисмида тирқиши бўлган ниқоб кийишга рухсат берилган. Эслатиб ўтамиз, август ойида ҳокимиятга келганидан сўнг толиблар аёлларнинг танасини бутунлай ёпадиган бурқа эмас, балки юзларини очиқ қолдирадиган ҳижоб кийиши мумкинлигини эълон қилганди. Ўшанда аёлларга ўқиш ва ишлаш учун рухсат берилиши, уларнинг бошқа ҳуқуқлари бузилмаслиги айтилган. Бироқ «Толибон» ҳукуматининг ҳаракатлари баёнотларига тобора зид келмоқда, дейилади хабарда. «Толибон» ҳукмронлигининг 4 ойи давомида аёлларнинг деярли барча ҳуқуқ ва эркинликлари чекланди: уларга оммавий ахборот воситаларида, давлат тузилмаларида ишлаш, ўз бизнесига эга бўлиш, спорт билан шуғулланиш, фильмларда роль ўйнаш, университетларда ўқиш тақиқланди. Афғонистоннинг аксарият вилоятларида ўрта ва катта синфдаги қизлар мактаблари ёпилди. «Толибон» Аёллар масалалари бўйича вазирликни тугатди, оиладаги зўравонлик қурбони бўлган аёллар учун барча бошпаналарни ёпди, аёллар иштирокидаги фильмлар намойишини тақиқлади, дея қайд этган Etilaatroz нашри.
