څلورو هېوادونو کاناډا، سویډن، اوکراین او بریتانیا ایران ته درې اوونۍ مهلت ورکړی چې د غورځول شوې اوکراینۍ الوتکې اړوند پوښتنو ته ځواب ورکړي.
دغو هېوادونو چې د الوتکې د لوېدو په پېښه کې یې اتباع وژل شوي، پرون پنجشنبه یوه ګډه اعلامیه کې وویل، د ایران د وضاحت نهورکولو په خاطر يې د صبر کاسه ډکه شوې ده.
د اوکراین دا مسافر وړونکې الوتکه د ۲۰۲۰ کال د جنورۍ په اتمه، هغه مهال د ایران د انقلاب ساتونکي ځواک په دوو توغندیو رانسکوره شوه چې د تهران له هوایي ډګره پورته شوه.
پېښه کې د الوتکې دننه سپاره ټول ۱۷۶ تنه ووژل شول چې یوشمېر افغانان هم پهکې وو.
دغو څلور هېوادونو ویلي، که ایران تر درېیو اوونیو پورې د دوی پوښتنو ته ځواب ورنهکړي، د نړیوالو قوانینو په رڼا کې به پر ایران د بېلابيلو اقداماتو په اړه غور وکړي.
هغه مهال چې دا الوتکه نسکوره شوه، څو ورځې پرې ایران ځان غلی کړی و، خو وروستهیې ومنله چې د دوی د ځواکونو د دافع هوا قوا په دوو توغندیو ویشتل شوې ده.
ایران د خپلو ځواکونو دا کار انساني تېروتنه بللې ده، خو دغه ادعا یې اوکرایني او کاناډایي چارواکو او ځينو څارونکو ته د قناعت وړ نهده.
دوی وایي، تهران لا هم د دغې پېښې پر اصلي دلایلو پرده اچوي.
د څلورو هېوادونو په اعلامیه کې راغلي، ایران دې ته زړه نا زړه دی چې د قربانیانو کورنیو ته تاوان ورکړي او د پېښې عاملان محاکمه کړي.
د قربانیانو کورنیو تېره میاشت په یوه راپور کې وویل، دې پېښه کې د ایران لوړپوړي چارواکي لاس لري.
ایران ویلي، د هر قرباني کورنۍ ته ۱۵۰ زره ډالر تاوان ورکوي، خو دا وړاندیز یې منل شوی نهدی.
کاناډا په تېره جون میاشت کې وویل، هېڅ داسې دلیلیې نهدی موندلی چې وښيي د دې الوتکې پرځول مخکې له مخکې پلان شوي و.
د کاناډا صدراعظم جستن ترودو په دې اړه د ایران رسمي دریځ "ریاکارانه، ګمرا کوونکی او سطحي" بللی دی.
