د کوسوو حکومت وایي، دوی چمتو دي چې خپلو زندانونو ته له ډنمارکه ۱۰۰ تنه زندانیان انتقال کړي.
ډنمارک پر خپلو زندانونو د فشار کمولو په هدف له کوسوو سره یوه هوکړه لاسلیک کړې ده.
د کوسوو د عدلیې وزارت ویلي، دا زندانیان د غیر اروپایي هېوادونو مجرمان دي چې کولای شي د حبس پاته موده د کوسوو په ختیځ پراته یوه زندان کې تېره کړي.
د وزارت په خبره دا خطرناک زندانیان نهدي.
کوسوو به له ډنمارک سره د دې ۱۰ کلنې هوکړې له مخې چې د پارلمان تأیید ته اړتیا لري، ۲۳۷ ملیونه ډالره ترلاسه کړي.
ډنمارک ویلي، له دې زندانیانو سره به کوسوو کې ورته چلند کېږي، خو د زندانیانو انتقال ځینې اندېښنې زېږولي دي.