“დავასრულეთ ბრიუსელში ნაყოფიერი სამუშაო ვიზიტი, რომლის ფარგლებშიც არაერთი მნიშვნელოვანი შეხვედრა შედგა.
ვიზიტი ნატოს სათავო ოფისიდან დავიწყეთ, სადაც გენერალურ მდივან იენს სტოლტენბერგს შევხვდი.
განვიხილეთ ნატო-საქართველოს ურთიერთობების დღის წესრიგი. აღვნიშნე, რომ ნატოს წევრობა, რასაც მხარს უჭერს მოსახლეობის აბსოლუტური უმრავლესობა, საქართველოს საგარეო და უსაფრთხოების პოლიტიკის პრიორიტეტულ საკითხს წარმოადგენს.
საქართველოს აქვს ყველა პრაქტიკული ინსტრუმენტი ნატოში შესასვლელად და მნიშვნელოვანია, მომზადდეს პოლიტიკური გადაწყვეტილება ნატოში საქართველოს გაწევრიანებასთან დაკავშირებით.
მადლობას ვუხდი ალიანსის გენერალურ მდივანს პირადი ძალისხმევისთვის ნატოში ინტეგრაციის გზაზე საქართველოს მხარდაჭერის კუთხით.
მონაწილეობა მივიღე აღმოსავლეთ პარტნიორობის მე-6 სამიტში, რომელიც საქართველოს მოქალაქეებისთვის კონკრეტული, ხელშესახები შედეგებით დასრულდა. მისასალმებელია, რომ სამიტის პოლიტიკურ დეკლარაციაში ასახულია ჩვენთვის პრიორიტეტული ძირითადი საკითხები და აღიარებულია ასოცირებული პარტნიორების ევროპული არჩევანი და მისწრაფებები.
საქართველოს ევროპული მისწრაფებისა და ევროპული არჩევანის სიმტკიცე კიდევ ერთხელ დავადასტურე ევროპული საბჭოს პრეზიდენტ შარლ მიშელსა და ევროკომისართან ევროპული სამეზობლო პოლიტიკისა და გაფართოების საკითხებში ოლივერ ვარჰეისთან, ასევე სამუშაო სადილზე, რომელიც ლიეტუვას რესპუბლიკის პრეზიდენტის გიტანას ნაუსედას სახელით „ასოცირებული ტრიოსა“ და ევროკავშირის წევრი ქვეყნების ლიდერების პატივსაცემად, აღმოსავლეთ პარტნიორობის სამიტის ფარგლებში გაიმართა.
ნაყოფიერი შეხვედრა მქონდა ესტონელ კოლეგა კაია კალასთან. ხაზი გავუსვით ჩვენს ქვეყნებს შორის არსებულ მაღალი დონის პოლიტიკურ დიალოგს და დავადასტურეთ მზადყოფნა ორმხრივი თანამშრომლობის კიდევ უფრო გაღრმავებისთვის.
ვიზიტის ფარგლებში ასევე შევხვდი ევროკომისიის ვიცე-პრეზიდენტ მაროშ შევჩოვიჩს, რომელთანაც განვიხილეთ
ენერგოუსაფრთხოების საკითხები და საქართველოში განახლებადი ენერგიის წარმოების კუთხით არსებული პოტენციალი,” – აღნიშნული ინფორმაცია პრემიერმინისტრის, ირაკლი ღარიბაშვილის ფეისბუქგვერდით ვრცელდება.
