გლდანის #18 სამკურნალო დაწესებულებაში გადმოყვანის შემდეგ მიხეილ სააკაშვილს პირველად შეხვდა პირადი ექიმი ნიკოლოზ ყიფშიძე. როგორც მან თქვა „TV პირველის" ეთერში, წინა დღეებთან შედარებით მიხეილ სააკაშვილის ჯანმრთელობის მდგომარეობა გაუარესებულია - საერთო სისუსტე უფრო მეტად არის გამოხატული.
ნიკოლოზ ყიფშიძის ინფორმაციით, ამჟამად მიხეილ სააკაშვილი მხოლოდ გლუკოზის აბებს იღებს.
„რამდენადაც ვიცი, 2-3 აბი. ეს არის და ეს. ასევე იღებს დამაწყნარებელ წამალს და ასევე დასაძინებელ საშუალებას, სხვა არაფერს. არც ტესტები აქვს გაკეთებული და არ ვიცით, რა ხდება“, - თქვა მან.
ყიფშიძემ აღნიშნა, რომ სააკაშვილს ესაუბრა ტესტების გაკეთების საკითხზე, თუმცა ის სასტიკი წინააღმდეგია #18 დაწესებულებაში ტესტების ჩატარებასა და მკურნალობაზე.
ექიმის თქმით, მას ციხეში ესმოდა პატიმრების შეძახილები. ყიფშიძემ დააზუსტა, რომ სააკაშვილთან საკანში არ ყოფილა, არამედ მას შეხვდა პაემნების ოთახში.
იმის დასადასტურებლად, რომ სააკაშვილი არ შიმშილობდა იუსტიციის სამინისტროს პენიტენციურმა სამსახურმა სააკაშვილის ციხის სამედიცინო ოთახში ვიზიტის კადრები გაასაჯაროვა. უწყება ამბობს, რომ კადრებში ჩანს, როგორ "იღებს საკვებს და ნატურალურ წვენს".
6 ნოემბერს სპეციალური პენიტენციურმა სამსახურმა სოციალურ ქსელში გაავრცელა ვიდეომასალა, რომლის გასაჯაროების კანონიერებას სახელმწიფო ინსპექტორის სამსახური სწავლობს.
პენიტენციურმა სამსახურმა მაღალი საზოგადოებრივი ინტერესით ახსნა კადრების გავრცელება და განმარტა, რომ „აღნიშნული ფოტო და ვიდეომასალა ნათლად ასახავს იმას, თუ როგორ იღებს პატიმარი მიხეილ სააკაშვილი საკვებს და ნატურალურ წვენებს დღის სხვადასხვა მონაკვეთში“.
სახალხო დამცველის მოადგილის გიორგი ბურჯანაძის თქმით, გავრცელებულ კადრებზე ასახული ოთახი არის #12 პენიტენციალური დაწესებულების ექიმის კაბინეტი, სადაც პატიმრები მიდიან, როცა აქვთ ჯანმრთელობასთან დაკავშირებული ჩივილები.
გავრცელებული კადრების შემდეგ ყოფილმა პრეზიდენტმა განაცხადა, რომ სპეკულაციების გამორიცხვის მიზნით, მან 6 ნოემბრიდან შეწყვიტა მინერალებისა და ვიტამინების მიღებაც.
სახალხო დამცველის მოადგილის ინფორმაციით „ამ ეტაპზე პატიმარს შეწყვეტილი და შეჩერებული აქვს ყველა ტიპის სამედიცინო დახმარების მიღების პროცედურა“.
8 ნოემბერს იუსტიციის სამინისტროს განცხადებით, "ჯანმრთელობის მდგომარეობის გაუარესების პრევენციის მიზნით და მომატებული საფრთხეებიდან გამომდინარე“, საქართველოს ყოფილი პრეზიდენტი, რომელიც დაკავების დღიდან შიმშილობს, მისი ნების საწინააღმდეგოდ, ოჯახის წევრების და ადვოკატების გაფრთხილების გარეშე, რუსთავის მე-12 დაწესებულებიდან გლდანის მე-18 სამკურნალო დაწესებულებაში გადაიყვანეს.
