Ամերիկյան Tesla և SpaceX ընկերությունների հիմնադիր Իլոն Մասկը, որը վերջերս գլխավորել է աշխարհի ամենահարուստ մարդկանց ցանկը՝ ըստ Forbes-ի, հայտարարել է, որ պատրաստ է ծախսել իր միջոցների մի մասը՝ մարդկությանը սովից փրկելու համար:
Ինչպես փոխանցում է «ՌԻԱ Նովոստի»-ն, այս մասին գործարարը գրել է իր թվիթերյան էջում: «Եթե Պարենի համաշխարհային ծրագիրը կարող է բացատրել «թվիթների» այս շղթայում, թե ինչպես 6 մլրդ դոլարը կարող է լուծել համաշխարհային քաղցի խնդիրը, ես պատրաստ եմ հենց հիմա վաճառել Tesla-ի բաժնետոմսերը և լուծել այն: Սակայն ֆինանսական հաշվետվությունը պետք է բաց լինի, որպեսզի հանրությունը տեսնի՝ ինչպես են ծախսվում փողերը»,- գրել է Մասկը:
ՄԱԿ-ի Պարենի համաշխարհային ծրագրի տնօրեն Դևիդ Բիզլին ավելի վաղ Մասկին կոչ էր արել միջոցներ նվիրաբերել քաղցի դեմ պայքարին՝ կանխելու համար «աղետը»: Նրա խոսքով՝ մարդկանց սովից փրկելու համար անհրաժեշտ է ընդամենը Մասկի կարողության (289 մլրդ դոլար) 2 տոկոսը:
Հիշեցնենք, որ էլեկտրամեքենանաներ արտադրող Tesla-ի արժեթղթերը գնաճ են գրանցել անցյալ շաբաթ, ինչի արդյունքում Մասկի կարողությունը մեկ օրում ավելացել էր 41 մլրդ դոլարով:
