Биринчи хабар: Ўзбекистонда Jurabek Laboratories қўшма корхонасида ишлаб чиқарилаётган “Спутник V” вакцинасининг дастлабки 260 500 дозаси Санитария-эпидемиологик осойишталик ва жамоат саломатлиги хизматига топширилди.
Иккинчи хабар: Ўзбекистондан Россияга пилот лойиҳаси доирасида ишга олиб кетилаётган 10 минг нафар ўзбекистонлик қурувчини эмлаш учун Россия Федерацияси Соғлиқни сақлаш вазирлиги томонидан Тошкентга 12 минг доза “Спутник лайт” вакцинаси олиб келинди.
Бу икки хабарни 12 октябрь куни Соғлиқни сақлаш вазирлиги матбуотга сиздирди. Бироқ вазирлик Ўзбекистонда Россия вакцинасининг йирик партияси ишлаб чиқарилган ҳолда, нега Россияга ишга олиб кетилаётган 10 минг киши учун Москвадан махсус Россия вакцинаси олиб келингани юзасидан изоҳ бермади.
Соғлиқни сақлаш вазирлигининг билдиришича, “Спутник лайт” билан фақат Ўзбекистондан Россияга “юборилиши мўлжалланган 10 минг нафар қурувчи мигрантлар эмланади. Вакцинация жараёни россиялик тиббиёт ходимлари томонидан амалга оширилади”.