Qırımda sentâbrniñ 28-nde saba 361 yañı COVID-19 hastası qayd etildi, bir kün evelsi hasta sayısı doquz kişi az edi.
Bu aqta Rusiye kontrolindeki Qırım yolbaşçısı Sergey Aksenov bildire.
«307 hasta tibbiy yardım içün muracaat etkende qayd etildi, 54 kişi daa evel qayd etilgen hastalarnen alâqada oldı. Bir künde 432 insan tüzeldi, bütün müddet devamında 67 435 kişi yahşı oldı», – dep yazdı Aksenov içtimaiy ağlardaki saifelerinde.
Qırımnıñ Rusiye sağlıq nazirliginiñ malümatına köre, keçken künü yarımadada 11 insan koronavirustan vefat etti, pandemiya devamında 2559 insan keçindi. Bir kün evelsi koronavirustan vefat etken 7 hasta ve qayd etilgen 352 yañı COVID-19 hastası aqqında haber etilgen edi.
Qırım ve Aqyardaki Rospotrebnadzor idaresi bildirgenine köre, Qırımnıñ bir çoq rayonında koronavirus vaziyeti kerginleşti. Müessise, Qırımda dördünci koronavirus dalğası beklenile, lâkin qırımlılar daa az aşı olmağa başladı, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.