"რეპორტიორები უსაზღვრებოდ" (RSF) მოუწოდებს საქართველოს, სასწრაფოდ გამოიძიოს ჟურნალისტებზე ჯაშუშობის ფაქტები
ამ მასობრივი მოსმენების შემცველი ათასობით ფაილი 12 სექტემბრის საღამოს გაავრცელა პირმა, რომელმაც საკუთარი თავი წარმოადგინა, როგორც სახელმწიფო უსაფრთხოების სამსახურის (სუს) ყოფილი თანამშრომელი. ფარული მოსმენების სამიზნეს წარმოადგენდნენ როგორც საქართველოს მართლმადიდებელი ეკლესიის სამღვდელოება, ისე უცხოელი დიპლომატები, აქტივისტები და ჟურნალისტები.
„ფარული თვალთვალის მასალები, თუ მათი ავთენტიკურობა დადასტურდება, უკიდურეს შეშფოთებას იწვევს თავისი მასშტაბების გამო, და ის ასევე უკანონო და მიუღებელია“, - აღნიშნა ჟანა კაველემ, RSF-ს აღმოსავლეთ ევროპისა და ცენტრალური აზიის მიმართულების ხელმძღვანელმა.
ორგანიზაცია „რეპორტიორები უსაზღვრებოდ“ მოუწოდებს საქართველოს ხელისუფლებას, რათა ერთხელ და სამუდამოდ შეწყდეს უპრეცედენტო თვალთვალი და უზრუნველყოს პროკურატურის მიერ 14 სექტემბერს აღძრული საქმის დამოუკიდებელი და გამჭვირვალე გამოძიება. ორგანიზაციის განცხადებაში ხაზგასმულია ისიც, რომ უკანონო თვალთვალის წინა შემთხვევების გამოძიება საქართველოში უშედეგოდ დასრულდა.
„პრემიერ-მინისტრმა ირაკლი ღარიბაშვილმა თავდაპირველად მთავარი ოპოზიციური პარტია დაადანაშაულა ამ გაჟონვის ფაბრიკაციაში, მაგრამ შემდგომ დასაშვებად მიიჩნია ის, რომ თვალთვალის სამიზნე საპატრიარქო იყო“, - აცხადებს ორგანიზაცია „რეპორტიორები უსაზღვრებოდ“, რომელიც უკიდურესად შემაშფოთებელს უწოდებს იმ გარემოებას, რომ საიდუმლო ჩანაწერების გაჟონვა 2 ოქტომბრისთვის დანიშნული ადგილობრივი თვითმმართველობის არჩევნების წინ, პოლიტიკურად დაძაბულ პერიოდში მოხდა.