სამნიძე: „ოცნება“ არჩევნებს ვერ გააყალბებს, თუ ყველა გაბრაზებული მოქალაქე გაბრაზებას ბიულეტენში დააფიქსირებს
„ყველანი უნდა დავარწმუნოთ იმაში, რომ ეს ხელისუფლება რომ წავიდეს, აუცილებელია, რომ 2 ოქტომბერს მივიდეთ საარჩევნო ყუთთან. თუ მივა ყველა ამომრჩეველი, ოპოზიციურად განწყობილი, თუ ყველა მოქალაქე ასე გაბრაზებული მივა და ამ გაბრაზებას ბიულეტენზე დააფიქსირებს, ვერ გააყალბებს „ქართული ოცნება“ არჩევნებს, ვერ დაიწერს იმ შედეგს, რასაც ახლა თავისი შიდა კვლევებით თავს გვახვევს. თავადაც იციან, რომ შიდა კვლევების შედეგი არ არის რეალისტური, მაგრამ ასე ცდილობენ მოატყუონ ამომრჩეველი, ასე ცდილობენ, რომ პირველ რიგში იმედგაცრუება იყოს და ნიჰილიზმი“, - განაცხადა ხათუნა სამნიძემ „დღის საუბრებში“ მსმენელის პასუხად. მისი განცხადებით, თვითმმართველობის არჩევნები ის არჩევნები არ არის, რომლითაც ხელისუფლება შეიცვლება, თუმცა არის გზა რიგგარეშე არჩევნებისკენ და, შესაბამისად, იმისკენ, რომ ხელისუფლების ცვლილება ცენტრალურ დონეზე განხორციელდეს:
„თვითმმართველობის დონეზე ხელისუფლების შეცვლა ნიშნავს პირველ ძალიან სერიოზულ ნაბიჯს ძალაუფლების შეცვლის და არჩევნების მოპოვების, საპარლამენტო არჩევნების მოპოვების. მაგრამ ამას სჭირდება არჩევნების ისე ჩატარება, რომ მივიღოთ ეს შედეგი“, - განაცხადა ხათუნა სამნიძემ.
2 ოქტომბერს საქართველოში ადგილობრივი თვითმმართველობის არჩევნებია დანიშნული. ოპოზიცია ამ არჩევნებს რეფერენდუმად მიიჩნევს „მიშელის შეთანხმების“ იმ დათქმის საფუძველზე, რომლის თანახმად, თუ „ქართული ოცნება“ ხმების 43%-ზე ნაკლებს მიიღებს, 2022 წელს რიგგარეშე საპარლამენტო არჩევნები უნდა გაიმართოს. „ქართულმა ოცნებამ“ ეს შეთანხმება დატოვა და აცხადებს, რომ თვითმმართველობის არჩევნებში 1 პროცენტიც რომ აიღოს, საპარლამენტო არჩევნები 2024 წლამდე არ ჩატარდება.