Для фізасобаў уводзяцца базавыя банкаўскія рахункі
Аляксандр Лукашэнка 23 верасня падпісаў указ № 363 „Аб бягучым (разліковым) банкаўскім рахунку фізічнай асобы з базавымі ўмовамі абслугоўвання”.
Дакумент прыняты ў мэтах падвышэння якасці і даступнасці банкаўскіх паслуг і сацыяльнай абароненасці грамадзян, адпаведная інфармацыя размешчана на сайце president.gov.by.
Указам устанаўліваецца права фізічнай асобы на адкрыццё аднаго базавага рахунку ў банкаўскай сістэме, а таксама вызначаецца мінімальны бясплатны пералік плацежных аперацый з яго выкарыстаннем.
Для фізічных асоб, якія жадаюць атрымліваць сацыяльныя і прыраўнаваныя да іх выплаты ў безнаяўнай форме, прадугледжаная абавязковасць адкрыцця базавага рахунку. Пераход да новай практыкі будзе паступовым, да 1 ліпеня 2025 года. Пры гэтым існыя магчымасці па атрыманні сацыяльных выплат у наяўнай форме не абмяжоўваюцца.
Таксама прадугледжаны абавязак наймальніка пералічваць належныя фізічнай асобе грашовыя сродкі ў выглядзе заработнай платы і прыраўнаваных да яе выплат на базавы рахунак, пазначаны фізічнай асобай.
„Прынятыя рашэнні дазволяць грамадзянам мінімізаваць выдаткі па найбольш запатрабаваных аперацыях банкаў”, — гаворыцца ў паведамленні.
Асноўныя палажэнні ўказа набудуць моц 1 сакавіка 2022 года.
Беларускае Радыё Рацыя
Фота: onliner.by