«Արցախում ռուս խաղաղապահները կմնան այնքան, քանի դեռ կարգավորված չէ հակամարտությունը»
«Ես կարծում եմ, որ ռուս խաղաղապահները Արցախում կմնան այնքան ժամանակ, քանի դեռ կարգավորված չէ արցախա-ադրբեջանական հակամարտությունը:
Հաշվի առնելով տարբեր գործոններ, Ադրբեջանի ապակառուցողական և կարծր դիրքորոշումն ու վարած քաղաքականությունը՝ դժվար թե հակամարտությունը կարգավորվի 1-3 տարվա ընթացքում: Ռուս խաղաղապահները այսօրվա դրությամբ հանդիսանում են տարածաշրջանում կայունության և խաղաղության պահպանման հիմնական և կարևոր երաշխավորը: Նրանց Արցախում մնալու ժամկետները Ռուսաստանի որոշելիքն է, քանի որ Ռուսաստանը հատուկ պատասխանատվություն է զգում տարածաշրջանում խաղաղության և կայունության պահպանման համար»,- ԳԱԼԱ-ի հետ զրույցում հայտարարեց Արցախի ԱԳ նախարար Դավիթ Բաբայանը:
Նա, անդրադառնալով Բերձորում տեղի ունեցած թուրք-ադրբեջանական զորավարժանքներին, հայտարարեց.
«Նման զորավարժությունները ոչ միայն չեն նպաստում խաղաղության և կայունության պահպանմանը, այլև հանդիսանում են վտանգ՝ ուղղված այդ խաղաղությանն ու կայունությանը»,- հայտարարեց Բաբայանը:
Չնայած Արցախում ռուս խաղաղապահների ներկայությանը՝ ադրբեջանական զինուժը պարբերաբար սադրանքների է դիմում՝ կրակելով Արցախի մարտական դիրքերի ուղղությամբ, խախտելով հրադադարի ռեժիմը, միաժամանակ հայտարարում, որ հայկական կողմն է խախտում հրադադարը: Դրանով ի՞նչ է փորձում ցույց տալ Ադրբեջանը, միգուցե այն, որ ռուս խաղաղապահներն ի վիճակի չե՞ն կատարելու իրենց գործառույթները:
Հարցադրմանն անդրադառնալով՝ Դավիթ Բաբայանը հայտարարեց.
«Պարզ է, որ մենք երբևիցե չենք խախտում հրադադարը և որևէ սադրանքի չենք դիմում, դա մեր ոճը չէ, և դա ապացուցվել է տասնամյակների ընթացքում:
Նման քայլերով Ադրբեջանը նախ և առաջ ուզում է այնպես անել, որ վաղվա օրվա նկատմամբ չլինի հույս, մարդիկ լքեն Արցախը: Իրենք հասկանում են, որ պատերազմ սկսելը շատ վտանգավոր է՝ հաշվի առնելով ռուս խաղաղապահների առկայությունը:
Բացի այդ, իրենց քայլերով փորձում են հարված հասցնել ռուս խաղաղապահների հեղինակությանը:
Ադրբեջանը երազում է ռուս խաղաղապահներին Արցախից դուրս հանել, որովհետև ռուս խաղաղապահների ներկայությունը Արցախի լինելիության գրավականներից է: Արցախի լինելիությունը ինքնին չի թողնի, որ Անդրկովկասյան տարածաշրջանը դառնա ծայրահեղության, ծավալապաշտական տարբեր վեկտորների գերի»:
Ռուստամ Մուրադովն ավարտեց իր առաքելությունը՝ որպես Արցախում խաղաղապահ զորախմբի հրամանատար, նրան կփոխարինի Միխայիլ Կոսոբոկովը: Խաղաղապահների հրամանատարի փոփոխությունը ինչո՞վ էր պայմանավորված, հնարավո՞ր է արդյոք Արցախում խաղաղապահ առաքելության գործունեության փոփոխություն:
Արցախի ԱԳ նախարար Դավիթ Բաբայանը, անդրադառնալով հարցադրմանը, նշեց.
«Ռուսաստանի զինված ուժերը կայացած կառույց է, նրանք ունեն արդեն կայացած ավանդույթներ՝ խաղաղապահ առաքելությունների իրականացման համար: Գեներալ Մուրադովը մեծ աշխատանք է կատարել այս ուղղությամբ և փաստորեն հանդիսացել է հիմնադիր հրամանատարը խաղաղապահ առաքելության: Այս փոփոխությունը նույնպես հանդիսանում է իրենց ավանդույթը, լոկացիոն բնույթում դա ընդունված կարգ է, և այդտեղ որևէ արտառոց բան չկա:
Հետևաբար այդ լոկացիոն փոփոխությունը սպասելի էր, և նոր հրամանատարը կշարունակի իրականացնել իր պարտականությունները որպես խաղաղապահ զորքի հրամանատար:
Այստեղ որևէ անձից դժվար թե կախված լինի առաքելության ընթացքը կամ ճակատագիրը»,-եզրափակեց Արցախի ԱԳ նախարար Դավիթ Բաբայանը:
Անահիտ Չալիկյան
The post «Արցախում ռուս խաղաղապահները կմնան այնքան, քանի դեռ կարգավորված չէ հակամարտությունը» appeared first on ԳԱԼԱ.