გაერომ დაგმო ავღანეთში მშვიდობიანი საპროტესტო გამოსვლების მიმართ თალიბანის სულ უფრო აგრესიული რეაქცია და საერთაშორისო თანამეგობრობას მოუწოდა, დიალოგი იქონიოს ავღანეთის ახალ მთავრობასთან, რადგან ომით განადგურებული ქვეყანა „ეკონომიკურ კოლაფსს“ უახლოვდება.
10 სექტემბერს გაეროს ადამიანის უფლებების სამმართველოს პრესმდივანმა განაცხადა, რომ მიღებული ინფორმაციით, შეიარაღებულმა მეომრებმა საბრძოლო ტყვიები და მათრახები გამოიყენეს დემონსტრაციის მონაწილეთა მიმართ, რომლებიც გამოვიდნენ თალიბების მეთაურობით მოქმედი მთავრობის წინააღმდეგ, რომლის მიზანია, მათი სიტყვებით, ადამიანის უფლებების შეზღუდვა.
„მოვუწოდებთ თალიბანს, შეწყვიტოს ძალის გამოყენება და თვითნებური დაპატიმრება მათი, ვინც იყენებს შეკრების თავისუფლებას, და ჟურნალისტებისა, რომლებიც აშუქებენ საპროტესტო გამოსვლებს“, განაცხადა რავინა შამდასანიმ. მან დასძინა, რომ გაეროს დოკუმენტირებული აქვს ოთხი ადამიანის სიკვდილი ცეცხლსასროლი იარაღით.
ეს კომენტარი გავრცელდა იმავე დღეს, როცა გაეროს გენერალურმა მდივანმა, ანტონიუ გუტერეშმა საერთაშორისო თანამეგობრობას მოუწოდა, გააგრძელოს დიალოგი ავღანეთის თალიბანის ხელმძღვანელობით მოქმედ მთავრობასთან და თავიდან აირიდოს "ეკონომიკის კოლაფსი". მისი განცხადებების ფონია მოლოდინი, რომ ქაბულიდან ადამიანების ევაკუაცია განახლდება მას შემდეგ, რაც თალიბანმა ერთი კვირის განმავლობაში პირველად ათობით ადამიანს მისცა ქაბულის კომერციული რეისით დატოვების უფლება.
გუტერეში ამ განცხადებებით გამოვიდა სააგენტო ფრანს-პრესის მიერ 10 სექტემბერს გამოქვეყნებულ ინტერვიუში, იმ მზარდი შიშის ფონზე, რომ კარს მომდგარი ეკონომიკური კრიზისი მილიონობით ავღანელს ჩააგდებს სიღატაკესა და შიმშილში. შეშფოთებას აძლიერებს ცნობები თალიბანის პირობებში ქალების, ჟურნალისტების და არასამთავრობო ორგანიზაციების წინააღმდეგ განხორციელებულ ძალადობაზე.
"თალიბანთან დიალოგი უნდა შევინარჩუნოთ, და ჩვენი პრინციპები პირდაპირ უნდა გამოვაცხადოთ - დიალოგი, ავღანელი ხალხის მიმართ სოლიდარობის განცდით", - უთხრა გაეროს ხელმძღვანელმა ფრანს-პრესს. "ჩვენი ვალია სოლიდარულები ვიყოთ იმ ხალხის მიმართ, ვინც ძალიან იტანჯება, სადაც მილიონები და მილიონები შიმშილით სიკვდილის საფრთხის ქვეშ არიან", - დასძინა გუტერეშმა.
ბოლო დღეებში ქაბულიდან და ქაბულში ხორციელდებოდა საერთაშორისო ფრენები ოფიციალური პირებისთვის, ტექნიკური საკითხების პროფესიონალებისთვის და დახმარების უწყებებისთვის - მაგრამ ქაბულიდან 9 სექტემბერს შემდგარი რეისი იყო სამოქალაქო პირებისთვის განხორციელებული პირველი ამგვარი ფრენა მას შემდეგ, რაც ავღანეთიდან ევაკუირებულ იქნა 124,000-ზე მეტი უცხოელი და საფრთხის ქვეშ მყოფი ავღანელი, რომლებიც თალიბანის მმართველობას გაექცნენ. 9 სექტემბრის რეისი ყატარის ავიახაზებმა განახორციელა, თვითმფრინავში 113-მდე პირი იყო, - იუწყებიან ოფიციალური პირები.
აშშ-ის ეროვნული უშიშროების საბჭოს პრესმდივნის, ემილი ჰორნის თქმით, თალიბანი "საქმიანი და პროფესიონალური" იყო აშშ-ის მოქალაქეებისთვის რეისის მომზადების პროცესში. ყატარის წარმომადგენელმა განაცხადა, რომ მეორე რეისი 10 სექტემბერს უნდა შემდგარიყო.