უსაფრთოების რისკებიდან გამომდინარე, ავღანეთში აშშ-ის საელჩო ამერიკის მოქალაქეებს ქაბულის აეროპორტისთვის თავის არიდებისკენ მოუწოდებს. განცხადება აშშ-ის საელჩოს ვებგვერდზე გამოქვეყნდა.
„ქაბულის აეროპორტში უსაფრთხოების რისკებიდან გამომდინარე, ჩვენ ვურჩევთ აშშ-ის მოქალაქეებს, მოერიდონ აეროპორტის გასასვლელებს. აშშ-ის მოქალაქეებმა, რომლებიც ახლა იმყოფებიან სხვადასხვა გასასვლელებთან, დაუყოვნებლივ უნდა დატოვონ ტერიტორია“, - წერია საელჩოს განცხადებაში.
საელჩო ასევე ურჩევს საკუთარ მოქალაქეებს აკონტროლონ მათ გარშემო ვითარება, განსაკუთრებით ხალხმრავალ ადგილებში, თვალყური ადევნონ ადგილობრივი ხელისუფლების მითითებებს, ადგილობრივ მედიას, ასევე აშშ-ის სახელმწიფო დეპარტამენტის ვებგვერდებს სოციალურ ქსელებში და საგანგებო სიტუაციებისთვის გეგმა იქონიონ.
შეგახსენებთ, 26 აგვისტოს, ქაბულის აეროპორტში მომხდარ აფეთქებას 200-მდე ადამიანი ემსხვერპლა. მათ შორის ქალები და ბავშვები. აფეთქებაზე პასუხისმგებლობა აიღო „ისლამურმა სახელმწიფომ“, თალიბანის და დასავლეთის მტერმა და განაცხადა, რომ მისი განშტოების, "ისლამური სახელმწიფო-ხორასნის" მებრძოლებმა სამიზნეში ამოიღეს "თარჯიმნები და ისინი, ვინც ამერიკის ჯართან თანამშრომლობენ".
