Нафақат “Пахтакор”, балки чемпионатимизнинг энг яхши легионери бўлиб келаётган сербиялик Драган Черан куни кеча клуби билан амалдаги шартномасини 2022 йил охирига қадар узайтирди. У ҳамма вақт жамоасининг яққол етакчиси ва тўпурари бўлиб келяпти. Шунинг учун “Пахтакор” Черан билан келишувни чўзди. Драган клуби билан шартномани узайтирганидан кейин ўз фикрлари билан ўртоқлашди. - Драган, “Пахтакор” билан шартномани узайтириш ташаббуси кимдан чиқди ва бунинг асосий сабаби нимада? - Иккала томондан ҳам қизиқиш борлиги учун дарҳол тил топишимиз осон кечди. Мураббий ва спорт директори ҳам ўртадаги келишувга қизиқиб қолгани учун ҳам бу ишлар осонлик билан кечди. - Келаси йили 35 ёшга тўласиз. Бу дейман, фаолиятингизни “Пахтакор”да тугатмоқчимисиз? - Ҳозирча мен футболчилик фаолиятимни якунлаш ҳақида ўйламаяпман. - Ўйлашимча, клуб сизга янада яхшироқ шартнома таклиф қилдими? Яъни, бу сафаргиси аввалгиларидан кўра сиз учун фойдалими? - Молиявий томондан ҳам мен ҳаммасидан қониқиш ҳосил қиляпман. - “Пахтакор” клуби сизнинг фаолиятингизда қандай ўрин тутади? Бу сиз тўп сурган жамоалар ичида энг яхшисими? - “Пахтакор”дек клубда кучли ўйин кўрсатяпман. Ҳаммаси бир-бирига мос тушаётганидан кўнглим таскин топяпти. Чунки “Пахтакор” ўзим тўп сурган клублар орасида кучлиси ҳисобланади. - Ўтган вақт давомида “Пахтакор”га нима бера олдим деб ўйлайсиз ва сиз клубдан нима ўргандингиз? - Мен уларга ўзимдаги 100 фоиз жанговар руҳни бериб келяпман. Ҳамкасбларим ёнига доим ижобий кайфиятда қайтаман. - Футболчилик фаолиятингиздан кейин ўзингизни “Пахтакор”да мураббий сифатида тасаввур қила оласизми? - Бу “Пахтакор”да кейинчалик қолиб мураббий сифатида ҳам соврин ва унвонларга эга чиқсам, ажойиб иш бўларди. - Легионер ўйинчи учун шу ёшда ҳам яхши спорт формасида бўлишнинг сири нимада? - Бу масалада яширадиган сирим йўқ. Шунчаки, профессионал сифатида киши ўз ишини 100 фоиз куч билан бажарар экан, ҳаммасига аста-секинлик билан эришиши муқаррар. Шунинг баробарида вақтида ва кучни тиклаб олиш учун тўхташ кераклигини, ҳордиқ чиқаришни ҳам ёддан кўтармаслик зарур. - Ўзбекистондаги фаолиятингиз мобайнида ҳужум чизиғида сиз учун энг яхши тандем ким эди? - Машарипов-Черан-Сергеев учлиги жуда қойилмақом даражада ўйнаган. - Тўпурарлар баҳсида “Сўғдиёна” ҳужумчиси Шохруз Норхонов сизга етиб олди. У ҳақда фикрингиз қандай? - Мен уни аъло даражадаги футболчи деб ҳисоблайман. У жуда иқтидорли йигит бўлиб, икки мавсум давомида ҳисобига кўплаб голларни ёзиб қўя олган. Бу эса унинг ҳамма вақт голлар киритиб келишидан далолат берадиган жиҳатдир.