Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков ZF-UZ-VAC2001 ўзбек–хитой вакцинасининг иккинчи ва учинчи дозалари билан эмлаш вақтинча тўхтатилгани ҳақидаги хабарга муносабат билдирди. «Ижтимоий тармоқларда Ўзбекистон ва Хитой ҳамкорлигида ишлаб чиқарилган вакцина билан 2- ва 3-маротаба эмлаш тўхтатилгани ҳақида хабар тарқалди. Рухсатингиз билан ушбу ҳолатга аниқлик киритмоқчимиз. Ҳозир дунё ҳамжамиятида эмлашга муносабат ўзгарган. Эмлаш воситаларига бўлган эҳтиёж кескин ортиб боряпти. Ўзбекистон шароитида ҳам ҳар куни 350 минг—400 минг аҳоли коронавирусга қарши эмланяпти. Сиз яхши биласизки, Ўзбекистон шароитида коронавирусга қарши вакциналар ишлаб чиқарилмайди. Демак, вакциналарни Ўзбекистонга олиб келиниши ва аҳолининг тегишли қатламини эмлаш бевосита олиб келинган вакциналар миқдори билан боғлиқ», – дейди Нурмат Отабеков. Қайд этилишича, қачонки вакцинанинг самарадорлиги 50 фоиздан юқори деб баҳоланса, самарадор деб ҳисобланади. Ҳозирда аҳолини ўзбек–хитой ҳамкорлигида ишлаб чиқарилган вакцина билан эмлаш фақат 1-эмлашнинг якунида 50 фоиздан юқори самарадорликка эришиляпти. Бундан ташқари, ЖССТ эмлашлар орасидаги интервални узайтириш мумкинлигини маълум қилган. «Шу билан биргаликда, ЖССТ эътироф этяптики, қачон вакциналар таъминотида узилишлар бўладиган бўлса ёки вакциналарни етказиб беришда қийинчиликлар бўладиган бўлса, у ҳолда эмлашлар орасидаги интервални бир мунча узайтириш мақсадга мувофиқ. Бу ўша белгиланган муддатда яна 12 ҳафтага узайтирилиши мумкин. Бу 3 ой давомида интервал сақлаши мумкин дегани. Хабарингиз бор 1 апрелдан бери вакцина билан эмлаяпмиз. Айнан ўзбек-хитой вакцинаси билан эмлаш тадбирлари таҳлиллари шуни кўрсатдики, 2-маротаба эмланиши керак бўлган аҳолининг 50 фоизи, 3-маротаба эмланиши керак бўлган аҳолининг 70 фоизи эмлаш тадбирларига келмаган. Бундан кўриниб турибдики, биз агар уларни 2- ва 3-дозани олишлиги учун келишларини кутиб ўтирсак, вақтдан ютқазамиз. Шу боис ҳам аҳолининг катта қисмида қисман бўлса ҳам иммунитет шакллантириш учун айнан олиб келинган вакцинани аҳоли учун 1-доза вакцинани ишлатишга мақсадга мувофиқ деб топдик. Негаки биз биринчи маротаба эмлашимиз орқали касалликка қарши қисман иммунитет шакллантиришимиз, қолаверса, касаллик юққан тақдирда ҳам уни оғир асоратлар билан кечишига йўл қўймаслигимиз мумкин бўлади», – дейди профессор. Нурмат Отабековнинг маълум қилишича, ЖССТ ҳозирда гибрид вакциналар борасида иш олиб боряпти. «Ҳозир дунё ҳамжамиятида вакциналарига эҳтиёж кескин ортиб боряпти. Аҳолининг вакциналарга бўлган ишончи ортяпти. Қолаверса, ҳозирда дунё ҳамжамиятида 4,5 миллиардга яқин вакцина ишлатилди. Шундай экан ЖССТ гибрид вакциналар ҳақида ҳам қайғуряпти. Бу агар биз бирон вакцина билан эмлашни бошласак, бошқа бир вакцина билан якунлаш мумкин дегани. Бундай ҳолатларга эҳтиёж бўладиган бўлса, у ҳолда вакциналар кетма-кетлиги ҳақида ўйлаб кўришяпти. Ўзбекистон шароитига мос равишда биз олиб келинган вакциналарни ва вакцинация билан боғлиқ янгиликларни кенг жамоатчиликка етказишга тайёрмиз. Ўйлайманки, вакциналар таъминотида ҳеч қандай муаммолар бўлмайди. Фақат биз имкон қадар кўпроқ аҳоли қатламини қамраб олиш мақсадида ҳозир биринчи маротаба эмланаётганларга вакциналар ишлатиш билан шуғулланяпмиз. Бу каби ахборотларни биз сизга етказамиз. Ўзбекистон ҳукумати бевосита ССВ ва санитария эпидемиология хизмати вакциналарни мамлакат эҳтиёжига мос равишда олиб келиш тадбирлари билан шуғулланяпти. Лекин дунёдаги вазиятни тан олишимиз ва шунга мос равишда хатти-ҳаракатларимизни шакллантиришимиз кераклигини асло унутмаслигимиз керак», – дейди Нурмат Отабеков.
